ށ. އަތޮޅު ކައުންސިލުން އިންތިޒާމުކުރާ މިލައުތުރު ހޭންޑްބޯޅަ މުބާރާތުގެ ސެމީ ފައިނަލް މެޗުގައި ބޮޑު ތަފާތަކުން މިލަންދޫގެ މައްޗަށް ކުރިހޯދާ ފޯކައިދޫގެ ޒުވާން ހޭންޑްބޯޅަ ކުލަބު މުބާރާތުގެ ފައިނަލުން ޖާގަ ކަށަވަރުކޮށްފިއެވެ.

މިއަދު ހަވީރު އޮތް ސެމީ ފައިނަލް މެޗް ފޯކައިދޫއިން ކާމިޔާބުކުރީ 20 – 10 ލަނޑުގެ ތަފާތު ބޮޑު ނަތީޖާއަކުންނެވެ. ފޯރިގަދަ މޮޅު ކުޅުމެއް ދެ ޓީމުގެ ފަރާތުން ވެސް ފެނިގެންދިޔަ ސެމީ ފައިނަލް މެޗް ޑޮމިނޭޓްކޮށްފައި ވަނީ ފޯކައިދޫއެވެ. ދެ ޓީމަށް ވެސް ވަރަށް ރަނގަޅު ފުރުޞަތުތަކެއް ލިބި ގޯލުގެ ތެރެއަަށް ވައްދައިނުލެވި ބޭކާރުވެގެންދިޔައެވެ. މެޗް ޕްރެޝަރުގެ ސަބަބުން ގިނަ ފައުލްތަކެއް ވެސް ފެނިފައި ވެއެވެ. ނަތީޖާއެއްގެ ގޮތުން މިލަންދޫގެ ކުޅުންތެރިއަކަށް ރަތްކާޑު ދައްކާ ދަނޑުން ބާލަންޖެހިފައި ވެސް ވެއެވެ.

ގިނަ އަދަދެއްގެ ސަޕޯޓަރުން މި މެޗު ބެލުމަށްޓަކައި ފޯކައިދޫ ކުޅިވަރު ސްޓޭޑިއަމްއަށް ވަދެފައި ވެއެވެ. މިއީ މިހާތަނަށް ހޭންޑްބޯޅަ މެޗެއް ބެލުމަށްޓަކައި އެންމެ ގިނަ މީހުން ފޯކައިދޫ ދަނޑަށް ސަޕޯޓުކުރުމަށްޓަކައި ވަތްފަހަރުކަން ވެސް ފާހަގަކޮށްލެވެއެވެ.

މުބާރާތުގެ ގުރޫޕް ސްޓޭޖުގައި ފޯކައިދޫ ކުޅުނު އެއްވެސް މެޗަކުން ބަލިނުވެ ސެމީއަށް ދަތުރުކުރުކޮށްފައި ވަނީ އެއްވަނަ ޓީމުގެ ގޮތުގައެވެ. މި މެޗުގެ މޮޅު ކުޅުންތެރިޔަކަށް ހޮވިފައި ވަނީ ފޯކައިދޫގެ ޖާޒީ ނަންބަރު 27 އާމިނަތު ރިޝާމާއެވެ. އޭނާ އަކީ މި މުބާރާތުގައި ފާހަގަކޮށްލެވޭ ވަރަށް ހުނަރުވެރި މޮޅު ކުޅުންތެރިއެކެވެ.

ދެވަނަ މިލައުތުރު ހޭންޑްބޯޅަ މުބާރާތުގެ ފައިނަލް މެޗް އޮންނާނީ 13 ނޮވެމްބަރ 2024 ވާ ބުދަ ދުވަހުގެ ރޭ 20:30 ގައި ފޯކައިދޫ ރަސްމީ ކުޅިވަރު ސްޓޭޑިއަމްގައެވެ. މި މެޗުގައި ފޯކައިދޫ ވާދަކުރަން ޖެހިފައި ވަނީ އެއްވަނަ މިލައުތުރު ހޭންޑްބޯޅަ މުބާރާތުގެ ޗެމްޕިއަން ޓީމް ކަމަށްވާ ފޭދޫ ހޭންޑްބޯޅަ ކުލަބާއެވެ.