ފޭރަކީ ހައްދަން ފަސޭހަ، ގިނައިން މޭވާ ވެސް އަޅާ މޭވާގަހަކަށް ވާތީ، މިއީ ކުރީ ޒަމާނުގައި ރާއްޖޭގައި ގިނަ އަދަދަކަށް ހެއްދި ބާވަތެކެވެ. އެހެން ނަމަވެސް މިހާރަކަށް އައިސް ދިވެހީންގެ ބާޒާރުތަކުން މުޅިންހެން ވެސް ފެންނަނީ ބޭރު ޤައުމުތަކުން އިމްޕޯޓުކޮށްފައި ހުންނަ ފޭރުގެ ތަފާތު ވެރައިޓީތަކެވެ.
ފޭރަކީ ޞިއްޙީ އެތަކެއް ފައިދާއެއް އޭގައި އެކުލެވޭ އެހާމެ މީރު ވެސް މޭވާއެކެވެ. ފޭރުން ލިބޭ ޞިއްޙީ ފައިދާތަކުގެ ތެރޭގައި ހަށިގަނޑުގައި ހުންނަ ހަކުރު ލެވެލްގެ ހަމަ ހިފެހެއްޓުމާއި، ހިތުގެ ދުޅަހެޔޮކަން އިތުރުކުމާއި، އަންހެނުންގެ މައްސަރުކަންތަކުގެ އުނދަގޫތައް ލުއިކޮށްދިނުމާއި، ހަޖަމުގެ ނިޒާމް ރަނގަޅު ކޮށްދިނުމާއި، ބަރުދަން ލުއިކޮށްދިނުމާއި، ކެންސަރު ޖެހުމުން ދުރުކޮށްދިނުމުގެ އިތުރުން އިންސާނުންގެ މުޅި ދިފާޢީ ނިޒާމް ރަނގަޅުކޮށްދިނުން ހިމެނެއެވެ.
ކުރީޒަމާނުގައި ޚާއްސަކޮށް ރަށްފުށުގައި ކޮންމެ ގެއެއްގައި ވެސް ފޭރުގަހެއް ހުރެއެވެ. އެއީ މޭވާގެ އިތުރުން ގޭދޮށަށް ހިޔާ ލިބޭ އަރާމުކޮށްލުމަށް ޖޯލިފަތި ނުވަތަ އުނދޯލި ހުންްނަތަން ވެސް މެއެވެ. އަދި ވަރަށް ގިނަ ލޯބީގެ ވާހަކަތައް ފެށިގެން އައިސްފައި ވަނީ އެފަދަ ފޭރުގަސްދޮށު ޖޯލިފަތިތަކުން ކަމުގައި ވެސް ވެއެވެ. އެހެން ނަމަވެސް މިހާރުގެ ޙާލަތު މުޅިން ބަދަލުވެއްޖެއެވެ. ދިވެހީން ފޭރުގަހާ ދުރުވެއްޖެއެވެ.
ފަހަކަށް އައިސް ސަރުކާތުތަކުން ދަނޑުވެރިކަން ތަރައްޤީ ކުރުމަށް މިލިޔަނުން ޚަރަދުކުރެއެވެ. އެހެން ނަމަވެސް މިފަދަ ފަސޭހައިން ހައްދާލެވޭ ބާވަތްތައް ވެސް ރާއްޖެއިން ބޭރުން އެތެރެނުކޮށް ފަރުޖައްސާލެވޭކަށް ނެތެވެ. ދިވެހީން މާބޮޑަށް ކަންނެތްވީ ހެއްޔެވެ. ނުވަތަ ދިވެހި ބޭހަށް ފޭރު ގާނަން ނުޖެހޭތީ އެކަން ނުކުރަނީ ހެއްޔެވެ. ނޫނީ ރާއްޖެއިން ބޭރުން އެތެރެކުރުމަށް ވުރެ، ރާއްޖޭގައި ހެއްދުން ޚަރަދުބޮޑު ވަނީ ހެއްޔެވެ. ނުވަތަ ކަމާބެހޭ ފަރާތްތަކުގެ އިޚުލާޞްތެރިކަމެއް ނެތީ ހެއްޔެވެ.
