ޞިއްޙީ ދުޅަހެޔޮ މުޖުތަމަޢެއް ބިނާކުރުމަށްޓަކައި ދުންފަތާ އެފަދަ އެެހެންވެސް އިސްތިއުމާލުކުރުންތަކަށް ދެވިހިފާފައިވާ މީހުން އެކަމުން ދުރުހެލިކުރުމަށް ހޭލުންތެރިކުރުމުގެ އިތުރުން ދުންފަތާ ދުރުހެލިވާން ނުވަތަ ހުއްޓާލަން ބޭނުންވާ މީހުންނަށް އެހީތެރިވެދިނުމަށްޓަކައި ށ. ކޮމަންޑޫ ޞިއްޙީމަރުކަޒުގައި ޚާއްޞަ ކުލިނިކެއް ތަޢާރަފުކޮށްފިއެވެ.
ދުންފަތުގެ އިސްތިއުމާލުކުރުމަށް އާދަވެފައިވާ ފަރާތްތަކަށް ޚާއްޞަ މި ކުލިނިކުން އެފަދަ މީހުންނަށް ބޭނުންވާ ޞިއްޙި އަދި ނަފުސާނީ އެހީތެރިކަމާ މަޢުލޫމާތު ފޯރުކޮށްދެވޭނެ ކަމަށް މަޢުލޫމާތު ލިބިފައި ވެއެވެ. ސަރުކާރުގެ ހަރުކަށި ފިޔަވަޅުތަކާއެކު އެތައް ބަޔަކު ދުންފަތުގެ އިސްތިއުލާކުރުމާ ދުރުހެލިވާން ބޭނުންވެއެވެ. މިހާރުގެ އަގުތައް ހުރިގޮތުން މީހުންނަށް ލިބޭ އާމްދަނީ އަކީ އެފަދަ ކަންކަމާއެކު ޚަރަދުތައް ފަރުޖެއްސޭނެ އާމްދަނީއެއް ނޫނެވެ. އެހެންކަމުން އެންމެ ރަނގަޅު ގޮތަކީ އެފަދަ އާދަތަކާ ދުރުވުންކަމުގައި ގިނަ ބަޔަކު ދެކެއެވެ.
އިއްޔެގައި ވަނީ ރާއްޖޭގައި ވޭޕުކުރުމާ ވިއްކުން މަނާކުރާ ބިލެއް މަޖިލީހުން ފާސްކޮށްފައެވެ. އެ ބިލު ތަސްދީޤުކުރުމުން ވޭޕު ވިއްކާ ކޮންމެ މީހެއް 20،000ރ. އިން ޖޫރިމަނާ ކުރާނެ އެވެ. އަދި، ވިއްކި ކޮންމެ ވޭޕަކަށް 10،000ރ. އިން ޖޫރިމަނާ ނެގޭނެއެވެ. ވޭޕު މަނާކުރުމަށްފަހު ހިލޭ ވޭޕެއް މީހަކަށް ދިނަސް 10،000ރ. އިން ޖޫރިމަނާ އަދި ބޭނުންކުރާ ކޮންމެ މީހަކު 5،000ރ. އިން ޖޫރިމަނާވާނެއެވެ.
