ޒުވާނުންގެ މެދުގައި މަޝްހޫރު އެޕަލް ވޮޗް ގެ ބޭންޑު އުފެއްދުމަށް ބޭނުންކޮށްފައިވާ މާއްދާއެއްގެ ސަބަބުން ކެންސަރު ޖެހުމަށް މަގުފަހިވާ ކަމަށް މިފަހުން ކޮށްފައިވާ ދިރާސާތަކުން ހާމަވެ، އެކުންފުނީގެ މައްޗަށް އެމެރިކާގައި ދައުވާކޮށްފިއެވެ. މަޝްހޫރު ޚަބަރުފަތުރާ ވަޞީލަތްތަކުން ބުނާގޮތުން މިފަހުން ކޮށްފައިވާ ދިރާސާތަކުން އެޕަލް ބޭންޑު އުފެއްދުމުގައި ޕަރފްލޫރޯއަލްކައިލް އަދި ޕޮލިފްލޫރޯއަލްކައިލް މާއްދާތައް (ޕީއެފްއޭއެސް) ބޭނުންކޮށްފައިވާކަން ވަނީ ހާމަވެފައިވެއެވެ. މިމާއްދާތަކަކީ ޢާންމުގޮތެއްގައި ފޭރާމުން ފެށިގެން ކޮސްމެޓިކްސް ބާވަތްތައް އުފެއްދުމުގައި ފުޅާ ދާއިރާއެއްގައި ބޭނުންކުރާ ކެމިކަލްތަކެކެވެ. އަދި މި މާއްދާތަކުގެ ސަބަބުން އުފަންވާ ކުދިންގެ ކިބައިގައި އައިބުހުރުމާއި، ޕްރޮސްޓްރޮސްޓޭޓާއި ކިޑްނީ އަދި ފިރިހެނުންގެ އޮށަށް ކެންސަރު ޖެހުމާއި އަންހެނުންނަށް ދިމާވާ ދަރިމައިވުމުގެ މައްސަލަތަކާ ގުޅުން ހުރިކަމަށް މީގެކުރިންވެސް ބެލެވިފައިވާ މާއްދާތަކެކެވެ.
އެޕަލްއިން ބުނާ ގޮތުގައި އެޕަލް ބޭންޑުތައް އުފައްދާފައިވަނީ ފްލޫރޯއިލަސްޓޮމަރއިންނެވެ. އެއީ ފްލޫރިން އެކުލެވޭ ސިންތެޓިކް ރަބަރެކެވެ. ނަމަވެސް އެޕަލް ކުންފުނީގެ މައްޗަށް ކޮށްފައިވާ ދަޢުވާގައި ބުނާ ގޮތުގައި އެޕަލްކުންފުނިންވަނީ މި ސިންތެޓިކް ރަބަރުގައި ޕީއެފްއޭއެސް އެކުލެވޭކަން ކަސްޓަމަރުންނަށް ވަންހަނާކޮށްފައެވެ. ވެއިތުވެދިޔަ ހަފްތާގެ އަންގާރަ ދުވަހު އެމެރިކާގެ ކެލިފޯނިއާގެ ކޯޓަކަށް ހުށަހަޅާފައިވާ މި ދަޢުވާގައި ވަކިން ޚާއްޞަކޮށް ބުނެފައިވަނީ ސްޕޯޓް ބޭންޑް، އޯޝަން ބޭންޑް، އަދި ނައިކީ ބްރޭންޑްގެ އެޕަލް ވޮޗްތަކާއެކު ފޯރުކޮށްދޭ ނައިކީ ސްޕޯޓް ބޭންޑްގައި މަތީ މިންވަރަކަށް ޕީއެފްއޭއެސް އެކުލެވޭ ކަމަށެވެ.
ސިއްހީގޮތުން އެކުވެރިއެއްގެ ގޮތުގައި ގިނަބައެއް ދެކޭ އެޕަލް ވޮޗާ ގުޅިގެން ފެތުރިފައިވާ ޚަބަރާގުޅިގެން އެޕަލްގެ މި ބްރޭންޑުތައް ބޭނުންކުރާ މީހުންގެ މެދުގައިވަނީ ހާސްކަން އުފެދިފައެވެ. ކަސްޓަމަރުންގެ ކަންބޮޑުވުންތަކާ ގުޅިގެން ނޫސްތަކަށް ދީފައިވާ ބަޔާނެއްގައި އެޕަލްއިން ބުނެފައިވަނީ، އެޕަލް ވޮޗް ބޭންޑްތަކަކީ ބޭނުންކުރާ ފަރާތްތަކަށް ރައްކާތެރި އެއްޗެހިތަކެއް ކަމަށެވެ.
