މައިކޮލެޖުގެ މިއަހަރުގެ ދަސްވެނިވުމުގެ ޙަފުލާގައި ވާހަކަފުޅު ދައްކަވަމުން ކުރީގެ ނައިބު ރައީސް ފައިސަލް ނަސީމް ވިދާޅުވީ ލިބޭ ސަނަދަކީ އެންޓްރީ ޓިކެޓެއް ފަދަ އެއްޗެއް ކަމަށާއި، ކާމިޔާބު މީހަކަށް ވުމަށްޓަކައި ވަރަށް ގިނަ ގުނަ މަސައްކަތް ކުރަންޖެހޭނެކަމަށާއި، ކުރާ ކޮންމެ ކަމެއް ވެސް ކުރެވޭ އެންމެ ރަނގަޅަކަށް ކުރުމަށް ޚާއްޞަ ސަމާލުކަމެއް ދެއްވައިފި ނަމަ ނަތީޖާ ވެސް ތަފާތު ވާނެ ކަމަށާއި، އެކަމަށް އިލްތިމާސް ކުރައްވާ ކަމަށެވެ.
އެމަނިކުފާނު އިތުރަށް ވިދާޅުވީ ދަސްކުރި އެއްޗެއްގެ ބޭނުން ހިފައިގެން އެންމެ ބޮޑަށް ބަދަލުކުރަންވީ އެމީހެއްގެ އަޚުލާޤު ކަމަށާއި، އެހެން މީހުންނާ ދެމެދު ކުރެވޭ މުޢާމަލާތްތަކުގެ އަޚުލާޤު ރަނގަޅު ކުރުމަކީ ދިރިއުޅުމުގެ ޙަޔާތުގައި ވެސް، މަސައްކަތުގެ މާާޙައުލުގައި ވެސް ކާމިޔާބު އަދި އިޙްތިރާމް ލިބޭ މީހަކަށް ވުމަށްޓަކައި ބޭނުންވާނެ ކަމެއް ކަމަށެވެ.
ބަދަލުވަމުންދާ ދުނިޔޭގައި ގޮންޖެހުންތައް ގިނަކަމަށާއި، ކަންފަސޭހަ ކޮށްލައިގެން ތިބެވެން ނެތްކަމަށާއި، ގަދައަޅާ މަސައްކަތް ކުރަންޖެހޭ ކަމަށެވެ. ހެޔޮ ނިޔަތުގައި އިޚުލާޞްތެރިކަމާއެކު ކުރާކަމެއް ބޭކާރުވެގެން ނުދާނެކަމަށާއި، އަބަދުވެސް ތެދުވެރި މީހަކަށް ވުމަށް ނަޞޭޙަތްތެރިވެ، އިލްތިމާސްކުރެއްވިއެވެ.
މައިކޮލެޖުން މިއަހަރުގެ ދެވަނަ ދަސްވެނިވުމުގެ ދަރުބާރުގައި 1590 ފަރާތެއް ސަނަދު ޙާޞިލުކޮށް ދަސްވެނިވެފައި ވެއެވެ.
