ރާއްޖޭގެ ފުޓްބޯޅައިގައި ކާމިޔާބު ބައި ގަރުނަށް ފަހު ފޯކައިދޫ އެފްސީގެ ހިންގުން ތަޣައްޔަރުވެ އެންމެފަހުން ދުނިޔޭގެ ފުޓްބޯޅަ ޖަމިއްޔާކަމުގައިވާ ފީފާއިން ސަސްޕެންޑް ކޮށްފައިވާކަން ކަށަވަރު ވެއްޖެއެވެ.
ފޯކައިދޫ އެފްސީގެ ނަމުގައި ކުލަބެއްގެ ގޮތުގައި ރަޖިސްޓަރީ ވުމަށްފަހު، ތަފާތު އެކި މުބާރާތްތަކުގައި ބޮޑެތި ކާމިޔާބީތަކެއް ވަނީ ޙާޞިލުކޮށްފައެވެ. ވިދި ވިދިގެން ރާއްޖޭގެ އެއްވަނަ ދެފަހަރަށް ކާމިޔާބުކޮށްފައިވާ ފޯކައިދޫ އެފްސީ މިހާ ދަށަށް ވެއްޓުނީތީ، ފުޓްބޯޅައަށް ލޯބިކުރާ ފަރާތްތަކުން ދަނީ ކަންބޮޑުވުން ފާޅުކުރަމުންނެވެ. ފޯކައިދޫ އަކީ ފުޓްބޯޅައަށް ލޯބިކުރާ ޒުވާނުންތަކެއް ދިރިއުޅޭ ރަށެކެވެ.
ތަފާތު އެކި މުބާރާތްތަަށް ރާއްޖެއިން ބޭރުންނާއި ރާއްޖޭގެ އެކި ކަންކޮޅުތަކުން ފާހަގަކުރެވޭ މޮޅެތި ކުޅުންތެރިންތަކެއް ވަނީ ކުލަބަށް ގެނެސްފައެވެ. އެހެން ނަމަވެސް ބައެއް ކުޅުންތެރިންނަށް ދޭންޖެހޭ މުސާރަ އާއި އެހެނިހެން އިނާޔަތްތައް ނުދިނުމުގެ މައްސަލަތަކެއް ވަނީ ފެންމަތިވެފައެވެ. އަދި އެއީ ފީފާއިން ފޯކައިދޫ އެފްސީ ސަސްޕެންޑް ކުރުމަށް ދިމާވި އެއް ސަބަބުކަމުގައި މަޢުލޫމާތު ލިބެއެވެ.
އަދި މިފަހަކަށް އައިސް ރާއްޖޭގައި ބޭއްވޭ ބޮޑު އެއްވެސް މުބާރާތަކުން ފޯކައިދޫ އެފްސީ ފެނިފައެއް ނުވެއެވެ. މަޢުލޫމާތު ލިބޭގޮތުގައި ކުލަބު މިހާރު އޮތް ޙާލަތުގައި އެއްވެސް މުބާރާތެއްގައި ބައިވެރިވުމުގެ ފުރުޞަތެއް ނުލިބޭނެއެވެ. އަދި ފީފާގެ ސަސްޕެންޝަނުން އަރައިގަތުމަށް އެއްވެސް މަސައްކަތެއް ކުރާތަނެއް ފެންނާކަށް ވެސް ނެތެވެ.
