މިދުވަސްކޮޅު އޮތީ ބަދަލުދިނުމުން ގުދޯ ގުދޯ ގޮވުން ކަހަލައެވެ. އެއް ބަޔަކު އަނެއް ބަޔަކަށް ގޮވަނީ ގުދޯ ގުދޯއެވެ. މިހާރުގެ ސަރުކާރަށް ތާއީދުކުރާ ފަރާތްތަކުން ބުނަނީ ބަދަލުގެ ގޮތުގައި އެންމެ ގިނަ ފައިސާ ދީފައިވަނީ ކުރީ ސަރުންކަމަށެވެ. އެއާ ވިއްދާ އެމްޑީޕީއަށް ތާއީދުކޮށް ވާހަކަދައްކާ ފަރާތްތަކުން ބުނަނީ ނޫނެކޭ، އެންމެ ގިނަ ފައިސާ ބަދަލުގެ ގޮތުގައި ދޭން ނިންމާފައި ވަނީ މިސަރުކާރުން ކަމަށެވެ.

އެމްޑީޕީ ދަނޑިކޮށި ޖަގަހައިގާ ރޭގައި އޮތް ޖަލްސާގައި އެކަމަށް އިޝާރާތްކުރައްވައި އެމްޕީ ނާޒިލް ވިދާޅުވީ ނިމިގެން ދިޔަ ސަރުކާރުގައި ދީފައި އޮތް ބަދަލެއް ވިއްޔާ ދީފައި އޮތީ މާލިއްޔަތު ކޮމިޓީން އެކަމާ ގުޅޭ މައްސަލަތައް ބަލައި، އެކުލަވާލި ރިޕޯޓް ފާސްކުރުމުން ރައީސް އިބްރާހިމް މުހައްމަދު ސޯލިހު އުފެއްދެވި ކޮމިޓީން ފާސްކޮށް އަދި ވަޒީރުންގެ މަޖިލީހުން ވެސް ފާސްކޮށްގެން ކަމަށެވެ. އެ ނޫން ގޮތަކަށް ލޯ ލާރިއެއް ވެސް ދީފައި ނޯންނާނެ ކަމަށާއި، ދިން އެއްޗެއް ވިއްޔާ ދިނީ އޭގެ ޙައްޤުވެރި ފަރާތްތަކަށް، ޤާނޫނާ ޤަވައިދުގެ ތެރެއިން ކަމަށެވެ.

އެހެން ނަމަވެސް ދިއްގަރު ދާއިރާގެ މެންބަރު އަޙްމަދު ނާޒިމް މަޖިލީހުގައި ވާހަކަފުޅު ދައްކަވަމުން ވިދާޅުވީ، 2 ބިލަޔަނަށް ވުރެ ގިނަ ފައިސާ އެމްޑީޕީ ސަރުކާރުން ޤާނޫނާ ޤަވައިދުގެ ބޭރުން ބަދަލުގެ ގޮތުގައި ދީފައިވާ ކަމަށާއި، އެ ފައިސާ ހޯދަންޖެހޭ ކަމަށާއި، އެކަން ކުރި ބަޔަކާ މެދު ޤާނޫނީ ގޮތުން ފިޔަވަޅު އަޅަންޖެހޭ ކަމަށެވެ.

ބަދަލު ދިނުމުގެ މައްސަލަ ތަޙްޤީޤުކުރުމަށް ގޮވާލުމާ ދެކޮޅަށް އިހުތިޖާޖުކުރަމުން އެމްޕީ ނާޒިލް ވިދާޅުވީ، މި ސަރުކާރުން ވެރިކަމަށް އައުމަށް ފަހު، މެލޭޝިއާގެ ކުންފުންޏަކަކަށް ބަދަލުގެ ގޮތުގައި ގާތްގަނޑަކަށް 7 ބިލިއަން ރުފިޔާ ދޭން ނިންމައި އެ ކުންފުންޏާއެކު އެއްބަސްވުން ހަދާފައިވާ ކަމަށެވެ. ބަދަލުގެ ގޮތުގައި އެންމެ ގިނަ ފައިސާ ދޫކުރި ފަރާތެއް ހޯދުމުގެ ބަހުސަކަށް ދައުލަތުން ބަދަލު ދިނުމުގެ މައްސަލަ ވެއްޖެއެވެ.