ޑިސެމްބަރު 12 ވަނަ ދުވަހު މާލޭގައި ހިނގި ބޮޑު އަލިފާނުގެ ހާދިސާގެ ސަބަބުން ދައުލަތުގެ ތިން ވުޒާރާއެއްގެ އިދާރީ އޮފީސް ވަނީ ބޭނުންނުކުރެވޭ ވަރަށް އަނދާފައެވެ. އޭގެ ތެރޭގައި ހައިދަރުގެ ހަސިންގ މިނިސްޓްރީ ހިމެނެއެވެ. އެ ވުޒާރާއިން ދެމުންގެންދިޔަ ޚިދުމަތްތައް ދަރުބާރުގޭގައި ދިނުމަށް މަސައްކަތްކުރަމުންދާ އިރު، އަދިވެސް ގެއްލުނު އެއްޗަކާ ސަލާމަތް ކުރެވުނު އެއްޗެއް ސާފެއް ނުވެއެވެ.
އަދި އެންމެ ބޮޑަށް ފާހަގަކުރެވޭ ކަމަކީ މިނިސްޓަރ ހައިދާރުގެ ވާހަކަފުޅުތަކުގައި އެއްވެސް ކޮންސިސްޓެންސީއެއް ނެތްކަމާއި، އެކި ފަހަރު އެކި ގޮތަށް މަޢުލޫމާތު ދޭކަމެވެ. އަދި ބައެއް ފަހަރަށް ވާހަކަފުޅު ދައްކަވާގޮތުން ވަރަށް ބޮޑު ކާމިޔާބެއް ލިބިގެން އުޅުއްވާހެން ވެސް ހީވާކަމަށް ފާޑުކިޔާ ފަރާތްތަކުން ތުހުމަތު ކުރެއެވެ.
ސާވާތައް ސަލާމަތްކުރާނެ ވަގުތު ލިބި އެކަން ނުކުރީ ކީއްވެތޯ ވެސް މީހުން ސުވާލު އުފައްދަން ފަށައިފިއެވެ. ހާދިސާ ހިނގި ދުވަހު ކްރިޓިކަލް އިންފްރާސްޓްރަކްޗަރ ސަލާމަތް ކުރުމަށް މުވައްޒަފުން ލަފާދިނުމުން ވެސް އެކަން ނުކުރެއްވި ކަމަށް ތުހުމަތުކޮށް ރައްޔިތުންގެ މަޖިލިސްގެ ކުރީގެ ނައިބު ރައީސް އަޙްމަދު ސަލީމް ވިދާޅުވީ، ރިސްކު އެސެސްމަންޓް ހެދިގޮތް އެއްގޮތަކަށް ވެސް ރަނގަޅު ނޫންކަމަށެވެ.
ސަރުކާރަށް ތާއީދުކުރާ ބައެއް ފަރާތްތަކުން ވެސް ގެންދަނީ ހިތްހަމަނުޖެހުން ފާޅުކުރަމުންނެވެ. އެގޮތުން ބައެއް މީހުން ސޯޝަލް މީޑިޔާގައި ބުނެފައިވަނީ މިނިސްޓަރ ހައިދަރަކީ މަޤާމަށް ކުފޫ ހަމަވާ މީހެއް ނޫންކަމަށާއި، ވަޒީރުކަމުން އިސްތިއުފާ ދޭންޖެހޭ ކަމަށެވެ.
