ނައިންޓީ ޕްލަސް ގޯލްޑް ކަޕްގައި މިއަދު ކުޅުނު މެޗުގައި ފަހަތުން އަރައި މާލެ ސިޓީގެ މައްޗަށް 3-1 އިން ކުރިހޯދާ ރ. އަލިފުށިން ގްރޫޕުގެ އެއްވަނަ ހޯދައިފިއެވެ.
އަލިފުށިން ވަނީ ދެ މެޗުން ހަ ޕޮއިންޓް ހޯދާފައިވާ އިރު، ދެވަނައިގައި އޮތް މާލެ ސިޓީ އަށް ލިބިފައި ވަނީ ތިން ޕޮއިންޓެވެ. ގުރޫޕުގެ އެންމެ ފުލަށް ދިޔައީ ޅ. ކުރެންދޫއެވެ. އެ ތީމަށް އެއްވެސް ޕޮއިންޓެއް ލިބިފައެއް ނުވެއެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި އަލިފުއްޓަށް ލަނޑުތައް ޖަހައިދިނީ ކެޕްޓަން މުޙައްމަދު ރަޝީދު (ހޮކޭ) އާއި އިބްރާހިމް ސަލާމުގެ އިތުރުން އަހުމަދު ހުސާމް (ހުސާންކޮ) އެވެ. އަދި މާލޭ ސިޓީން ކާމިޔާބުކުރި ހަމައެކަނި ލަނޑު އެޓީމަށް ޖަހައިދިނީ އަލީ ޝަރީފް (އައްޔަ) އެވެ.
ކުއާޓާ ފައިނަލް މެޗުތައް ފަށާނީ ބުދަ ދުވަހު އެވެ. ފުރަތަމަ މެޗުގައި ބުދަ ދުވަހުގެ ހަވީރު ބައްދަލުކުރާނީ ބ. އޭދަފުށި އާއި ޅ. ނައިފަރެވެ. ދެވަނަ މެޗުގައި ބައްދަލުކުރާނީ ކ. ގުރައިދޫ އާއި މާލެ ސިޓީއެވެ.
