ހއ. ކެލައަށް އުފަން ފާތިމަތު މުފާޒާ އަކީ އަބަދުވެސް ތަޙްޤީޤުކުރުމާއި، ދިރާސާކުރުމަށް އާދަޔާ ޚިލާފު ޝައުޤުވެރިކަމެއް ހުންނަ ފަރާތެކެވެ. އެހެންކަމުން ޝަރީއާ އެންޑް ލޯގެ ދާއިރާއިން މަތީ ތަޢުލީމު އުނގެނުމަށްޓަކައި އެވިޑް ކޮލެޖުން ހިންގާ ބެޗެލަރ އޮފް ޝަރީއާ އެންޑް ލޯ ކޯހުގައި ބައިވެރިވެ، ކޯސް ފުރިހަމަކޮށް ހޯދީ ފަޚުރުވެރި އެއްވަނައެވެ.
2023 ވަނަ އަހަރު އެ ކޮލެޖުން އެސޯސިއޭޓް ޑިގްރީ އިން ޝަރީއާ އެންޑް ލޯ ފުރިހަމަކޮށް ކޯހުން އެއްވަނަ ޙާޞިލުކޮށްފައި ވެއެވެ. އެހެންކަމުން މުފާޒާއަށް ޝަރަފުވެރި ތިން އެވޯޑެއް ލިބިފައި ވެއެވެ. އެސޯސިއޭޓް ޑިގްރީ ކޯހުން ޑީންސް އެވޯޑާއި، ބެޗެލާސް އޮފް ޝަރީއާ އެންޑް ލޯ ކޯހުން ޑީންސް އެވޯޑު ލިބުމުގެ އިތުރުން މިއަހަރުގެ ޗެއާމަންސް އެވޯޑު ވެސް ލިބިފައި ވެއެވެ. އެއީ ކިޔެވުމަށް އެންމެ މޮޅު ދަރިވަރުންނަށް އެވިޑް ކޮލެޖުން ދޭ ޝަރަފުވެރި އެވޯޑެކެވެ.
އަމިއްލަ ޝައުޤުވެރިކަމުގެ އިތުރުން ފިރިމީހާ އަކީ ވެސް ޤާނޫނީ ވަކީލަކަށް ވީތީ، ޤާނޫނީ ދާއިރާއިން މަތީ ތަޢުލީމު ހޯދުމުގެ ޝައުޤުވެރިކަން އިތުރުވުމާއެކު އެވިޑް ކޮލެޖުގައި ކިޔަވަން ފެށިއެވެ. ކޯހުގެ ކިޔެވުން ފެށުނުތާ މާގިނަދުވަހެއް ނުވަނީސް އަލަތު ދަރިފުޅަށް ބަލިވެއިނދެއްޖެއެވެ. އަދި ބަލިވެއިނުމާ ގުޅިގެން ޞިއްޙީ ގޮތުން ތަފާތު ގޮންޖެހުންތަކާ ކުރިމަތިލާން ޖެހި، މީހާއަށް ނަފުސާނީ ގޮތުން އުނދަގޫތަކާ ކުރިމަތިލާން ޖެހުނެވެ.
ދަރިއަކަށް ބަލިވެއިނުމަކީ ބޮޑު ނިޢުމަތެއް ކަމުގައި ޤަބޫލުކޮށް، ކޯސް ދޫކޮށްލާން ނުނިންމާ ހިތްވަރާއި ޢަޒުމާއެކު މަސައްކަތް ކުރީ ކޯހުން ފުރިހަމަ ކާމިޔާބީއެއް ޙާޞިލުކުރުމަށެވެ. ނަތީޖާއެއްގެ ގޮތުން 2024 ވަނަ އަަހަރު ދަސްވެނިވި ހުރިހާ ދަރިވަރުންގެ ތެރެއިން ތަޢުލީމީ ގޮތުން އެންމެ މޮޅު 5 ދަރިވަރުންގެ ތެރޭގައި މުފާޒާ ހިމެނެއެވެ.
މުފާޒާގެ ކާމިޔާބު ތަޢުލީމީ ޙަޔާތުގައި ދިމާވި ދަތި އުނދަގޫތަކާ ގޮންޖެހުންތައް ހުރަސްކޮށް، ހިންމަތާ ކެތްތެރިކަމާއެކު، ކުރި ބުރަ މަސައްކަތުން އަދު މިވަނީ އުފާވެރި ކާމިޔާބީތަކެއް ލިބިފައެވެ. އެހެންކަމުން ހިތުގެ އިޚުލާޞްތެރި ޝުކުރު ފިރިމީހާއަށް އަދާކުރަމުން މިކާމިޔާބީތައް އޭނާ ޚާއްސަކުރަނީ އޭނާގެ އަލަތު ދަރިފުޅަށެވެ. އަދި ލޯތްބާއެކު މަންމައާ ބައްޕައަށް ޝުކުރު އަދާކުރެއެވެ.
އަދި ޕްރޮފެޝަނަލް ގޮތެއްގައި ޤާނޫނީ މަސައްކަތް ކުރުމަށްޓަކައި “ޝުކްޒާ ލީގަލް ކޮންސަލްޓެންސީ” ގެ ނަމުގައި ދެމަފިރިން ހިއްސާވާ ލޯ ފާމެއް ޖިސްޓަރީކޮށް ޚިދުމަތްދޭން ވަނީ މިހާރު ފަށާފައެވެ.
