މިދިޔަ ޑިސެމްބަރު 15 ވީ އާދީއްތަ ދުވަހަކީ މުޅި މާލޭގެ ރައްޔިތުން ހާސްކޮށްލި ބޮޑު އަލިފާނުގެ ޙާދިސާއެއް ހިނގާދިޔަ ދުވަހެކެވެ. ދައުލަތުގެ ތިން ވުޒާރާއެއްގެ އިދާރީ އޮފީސް ހުރިހާ ލިޔެކިޔުންތަކާއެކު އަނދާ ހުލިވެގެންދިޔަ “ހައިދަރު އަލިފާން” ގެ ނަމުން ވަނަން ދެވިފައިވާ ހާސްކަމެއްގެ ތެރެއަށް މުޅި ޤައުމު ވެއްޓުނު ދުވަހެކެވެ.
އެދުވަހު ވެސް މީހުންގެ ނުސީދާ ތުހުމަތުތައް ކުރެވެމުންދިޔައެވެ. އަލިފާން ކޮންޓްރޯލުކުރަން ވަގުތު ލިބި، ސަލާމަތް ކުރެވެންޖެހޭ އިމާރާތްތަކާއި، ސާވާތަކާއި، އެހެނިހެން ސާމާނުތައް ސަލާމަތް ނުކުރެވުނީ ކީއްވެތޯ މީހުން ސުވާލު ކުޅަތެވެ. ނަމަވެސް ދައުލަތުގެ ކަމާބެހޭ ފަރާތްތަކުން ބުނަމުންގެންދިޔައީ މީހުން ސަލާމަތްކުރުމަށް އިސްކަންދިނުމުގެ ސަބަބުން އަލިފާން ކޮންޓްރޯލުކޮށް ނިއްވާލުމުގައި ދަތިތަކާއި ކުރިމަތިވީ ކަމަށެވެ.
ކުއްލިއަކަށް ރޭގައި އިވެންފެށި އަޑަކީ އެޗްޑީސީން ވަގަށް 50 ގޯއްޗެއް ވިއްކާލި ވާހަކައެވެ. އަދި އެއާ އެކު ހައުސިންގ މިނިސްޓްރީގައި ހިނގާދިޔާ އަލިފާނުގެ ޙާދިސާއަކީ ހެކި ނައްތާލަން ހިންގި ޖަރީމާއެއް ކަމުގެ ތުހުމަތު ކުރާން ފަށައިފިއެވެ. ބައެއް މީހުން ތުހުމަތުކުރާ ގޮތުގައި އެޗްޑީސީގެ ގޯތީގެ ކަރަޕްޝަންތަކާ އަލިފާނުގެ ޙާދިސާއާ ގުޅުމެއް އޮތުމަކީ އެކަށީގެންވާ ކަމެކެވެ.
އެޗްޑީސީގެ ގޯތީގެ މައްސަލަތައް މިހާރު ގެންދަނީ ތަޙްޤީޤު ކުރަމުންނެވެ. ދިވެހި ފުލުހުންގެ ޚިދުމަތާއި، އޭސީސީއިން ތަޙްޤީޤު ހިންގުމަށް ޕީޖީ ވެސް ވަނީ އަމުރު ކުރައްވާފައެވެ. ގޯތި ހޯދުމަށް ހުށަހަޅާފައިވަނީ ޞައްޙަ ނޫން ލިޔެކިޔުންތަކެއް ކަމަށް ފުލުހުން ވަނީ ކަށަވަރުކޮށްދީފައެވެ. އަދި އިތުރު ކަންކަން އޭސީސީން ތަޙްޤީޤު ކުރަމުންގެންދާ ކަމަށް އެ ކޮމިޝަނުން ވަނީ ކަށަވަރު ކޮށްދީފައެވެ.
އަދިި ގޯތި ޙައްޤުވާ އެއްވެސް ފަރާތަކަށް އެފަރާތްތަކުގެ ޙައްޤަކަށް އެއްވެސް އުނިކަމެއް މިކަމުގެ ސަބަބުން ނާންނާނެކަމުގެ ޔަޤީންކަން ސަރުކާރުގެ ތަރުޖަމާނު ވަނީ ރައްޔިތުންނަށް ޔަޤީންކޮށްދީފައެވެ.
