އިންޑިއަން އައިޑޮލް ސީޒަން-15 ގައި އުމުރުން އެންމެ 15 އަހަރުގެ ރާގިނީ ޝިންޑީ، އެންމެ ފަހުން ހުށަހަޅައިދިން ލަވަ ”އެއިސާ ސަމާ ނާ ހޯތާ“ އަށް ތަރުހީބާ ތައުރީފު އޮހެން ފަށައިފިއެވެ.

ރާގިނީގެ ޚާއްސަ މެހެމާނުންގެ ގޮތުގައި ”ސީއައިޑީ“ ޓީމްގެ ކުރިމަތީގައި ލަވަ ހުށަހަޅައިދެމުންދިޔަ އިރު، މަޝްހޫރު ލަވަކިޔުންތެރިން ކަމަށްވާ ޝްރިޔާ ގޯޝާލް އާއި، ޕަޕޮން އަދި ބާދު ޝާހުގެ އިތުރުން ވިޝާލް ވެސް ސޮނިވެއްޓިފައި ތިއްބެވެ. ލަތާ މަންގެޝްކަރ (އޮރިޖިނަލް ލަވަކިޔުންތެރިޔާ) ގެ އެ ރީތި ލަވަ ރާގިނީގެ އަޑުން ހުށަހަޅައިދިންލެއް ފުރިހަމަވެފައި އަޑުގެ ސާފު ސާދާކަމުން ތައުރީފުނުކުރާ ހަމަ އެކެއް ވެސް ނެތެވެ.

ސީއައިޑީ ޓީމުން ބުނީ އެމީހުންނަށް ބުނާނެ އެއްޗެއް ވެސް، ކުރާނެ ކޮމެންޓެއް ނެތްހާ ފުރިހަމަ ކަމަށާއި، އަސަރު ގަދަ ރީތި ޤުދުރަތީ އަޑެއްގެ ވެރިއެއް ކަމަށާއި، ކާމިޔާބު ކުރިމަގަކަށް އެދޭކަމަށެވެ. ރާގިނީ އަކީ ”ސީއައިޑީ“ ގެ ވަރަށް ބޮޑު ފޭނެކެވެ.

ރާގިނީގެ ހުށަހެޅުން ރީތިކަމުން މުޅި ސޯޝަލް މީޑިޔާއާ ޔޫޓިއުބްގައި އޮތީ ތައުރީފުކުރުމާއި، މަރުހަބާ އާއި ހެޔޮ ދުއާތަކެވެ. ގިނަ ކޮމެންޓްތަކުގައިވާ ގޮތުން ރާގިނީއަށް އިންޑިއަން އައިޑޮލްގެ ޓައިޓަލް ޙައްޤުވެއްޖެ ކަމަށެވެ. ސީއައިޑީގެ ފަރާތުން ސީއައިޑީ ބެޖް ވެސް ވަނީ ރާގިނީއަށް ހަދިޔާކޮށްފައެވެ.