އެފްއޭއެމްގެ ރައީސް ބައްސާމް އަދީލް ޖަލީލަކީ، ޒަމާންތަކެއް ވަންދެން ބާރާ ނުފޫޒުގައި ރާއްޖޭގެ ފުޓްބޯޅަ އަތަށް ލައްވައިގެން އުޅުއްވި ވަރަށް ބޮޑު ވެރިއެކެވެ. އަތައް ފަޔަށް މީހުން ލައްވައިގެން ވަރަށް ޢިއްޒަތުގައި އުޅުއްވި ރައީސެކެވެ. އެހެން ނަމަވެސް މިއަދު ފެންނަނީ އެކަނިވެ، ބާކީވެ، ގިނަވާތަނެވެ.

އޭނާގެ މައްޗަށް ފުލުފުލުގައި މައްސަލަތައް ތިލަވާންފެށި ހިސާބުން މަދަދުގާރުންތައް ވިއްސި ވިހާލި ވެއްޖެއެވެ. ކުރިން ވަފާތެރި ކުލަބުތަކުގެ އިސްވެރިން ވެސް މަޑު މަޑުން ފެޔަށް ޖެހިއްޖެއެވެ.

ޕްރޮސެކިއުޓާ ޖެނެރަލް (ޕީޖީ) އޮފީހުން ބުނީ ބައްސާމް، އަމިން ކޮންސްޓްރަކްޝަންގެ އަމީން އެވެނިއު އިން އެޕާޓްމަންޓެއް ގަތުމަށް ފައިސާ ޖަމާކުރުމަށްޓަކައި އެފްއޭއެމްގެ 1.2 މިލިއަން ޑޮލަރަށް ހިނާތްތެރިވެފައިވާތީ ހިޔާނަތްތެރިވުމުގެ ދައުވާ އުފުލާފައިވާ ކަމަށެވެ. މި ދައުވާ ސާބިތުވެއްޖެނަމަ 1 އަހަރާއި 7 މަހާއި 6 ދުވަހުގެ މުއްދަތަކަށް ޖަލަށް ދާންޖެހޭނެ އެވެ.

ދެން އޮތް އަނެއް ދައުވާއަކީ އަމީން އެވެނިއުގެ ބްލޮކް A ގެ 12 އަދި 13 ވަނަ ފަންގިފިލާގެ އަށް ކޮޓަރި އާއި 10 ފާހަނައިގެ އެޕާޓްމަންޓް ގަތުމަށް އެއްބަސްވުމެއްގައި ސޮއިކޮށް، އެ އެއްބަސްވުމުގެ ދަށުން އަމީން ކޮންސްޓްރަކްޝަނަށް ޖީއެސްޓީ ހިމެނޭގޮތަށް ދައްކަންޖެހޭ ޖުމްލަ 25 މިލިއަން ރުފިޔާގެ ތެރެއިން ބުކިން ފީ އާއި ކޮމިޓްމަންޓް ފީ ހިމެނޭ ގޮތަށް އެ ތަނުގެ އަގަށްވާ ފައިސާ، އެފްއޭއެމްގެ ޑޮލަރު އެކައުންޓުން އެކި އެކި ކުންފުނިތަކަށް ފައިސާ ފޮނުވައި، އެ ފައިސާ އަމީން ކޮންސްޓްރަކްޝަނަށް ދައްކާފައިވާތީ އެވެ. މި ދައުވާ ސާބިތުވެއްޖެނަމަ 100,000ރ. އިން 1،000،000ރ. އާއި ދެމެދުގެ އަދަދެއްގެ ޖޫރިމަނާއެއްގެ އިތުރުން 5-15 އަހަރާ ދެމެދުގެ މުއްދަތަކަށް ޖަލަށް ދާންޖެހޭނެއެވެ. އަދި މީގެ އިތުރުން އެފްއޭއެމަށް ލިބުނު ގެއްލުމުގެ ބަދަލުގެ ގޮތުގައި ބައްސާމް އަތުން 1.2 މިލިއަން ޑޮލަރު ނެގުމާއި އެ ޕެންޓްހައުސް ދައުލަތަށް ނެގުމަށް ވެސް އެދިފައި ވެއެވެ.

މި ޚަބަރުތައް ފެންމަތިވުމާއެކު ކުރިން ބައްސާމް ޕްރޮމޯޓުކުރަން އުޅުނު އެތައް ހާސް ބަޔަކު ވީނުވީތަނެއް ނޭނގި ގެއްލިއްޖެއެވެ. އަދި އެކުގައި އުޅުއްވި ކުޅިވަރު ބޮޑުންނާއި، ވިޔަފާރިވެރިންނާއި، އަންހެން ކުދިން މިއަދަކު ނުފެނެއެވެ.