މާލޭގެ މަގުތަކަކީ ރައްޔިތުންނަށް ރައްކާތެރި އަމާންތަނަކަށް ހެދުމަށްޓަކައި އަދު މިވަނީ އަލުން އައު އަޒުމަކާއެކު މަސައްކަތް ފަށާންޖެހިފައެވެ.
މަގު ފޭރޭ މީހުންނާއި، ގުރޫޕްތައް ހަދައިގެން މާރާމާރީ ހިންގާ މީހުންނާއި، ހަމަ އެއްވެސް ސަބަބަކާނުލާ މީހުންނާ ހަނގާކޮށް ފޮށޭ މީހުންނާ ހެދި އުފަން ދަރިއަކު އެކަނިދާން ދޫކޮށްލަން ނުކެރޭ ވަރު ވެފައެވެ. ކަރުގައި އޮންނަ ފަށް ޖަހައިގަންނަނީ ވެސް ރޯމާ ދުވާލު އެއްވެސް ލަދެއް އަގަލެއް ހަޔާތެއް ނެތި އެންމެންގެ ލޯކުރިމަތީގައެވެ.
ދެން އޮތީ އަނެއް ވާހަކައެވެ. މާލޭގައި ވެހިކަލް ޕާކުކުރުމާއި، މުދާ ބެހެއްޓުމާ އުކާލަންޖެހޭ ކުނިބުނި ބެހެއްޓުމުގައި އެއްވެސް ހަމައެއް ލަމައެއް ނެތުމުގެ މައްސަލައެވެ. އެމީހަކަށް ބެހެއްޓުނު ގޮތަކަށް ބެހެއްޓުނު ހިސާބެއްގައި ބަހައްޓަނީއެވެ. ތިމާ ނޫނަސް ދުނިޔޭގައި އެހެން މީހުންވެސް އުޅޭނެކަން ދަންނަ މީހަކު ނެތް ފަދައެވެ.
ނިންމާލަމުން ބުނެލަން އޮތީ ގާނޫނު ތަންފީޒުކުރުމުގެ ވާހަކައެވެ. އެއީ ވަކިން ކުޑަ ވާހަކައެއް ނޫނެވެ. ތަންފީޒީ އިދާރާތަކުން ގާނޫނާ ގަވައިދަށް ހުރުމަތްތެރިކޮށް ނުހިތާ ނަމައީ، ތަންފީޒުކުރުމުގެ ހައިސިއްޔަތު ގެއްލުނީއެވެ. އިސްލާހުވާންވީ ވަކި ހިސާބަކުން ނޫނެވެ. އެންމެން ވެސް އިސްލާހު ވާންވީއެވެ.
