މަޝްހޫރު ޕޮޕް ލަވަކިޔުންތެރިޔާ ޖަސްޓިން ބީބާގެ ފަރާތުން މިހާރަކަށް އައިސް ފެންނަ ރަނގަޅު ކަންކަމުގެ ސަބަބުން ސަޕޯޓަރުން އުފާކުރަން ފަށައިފިއެވެ.
މޫނުމަތީގެ އެއްފަޅިން ވާގިނެތިގެން ފަރުވާ ހޯދުމަށް ފަހު މިހާރު އޭނާ ރަނގަޅުވެފައި ވާކަމަށާއި، މިހާރު ބޮޑަށް ފެންނަނީ އަރާމުކުރުމާއި، އާއިލާއަށް ވަގުތު ދީގެން ދިރިއުޅުމުގެ ކަންކަން ރަނގަޅުކުރުން ކަމަށް ޖަސްޓިންގެ އާއިލާ އާއި ހަވާލާދީ ރިޕޯޓް ކޮށްފައި ވެއެވެ.
ދާދި ފަހަކުން މީހުންގެ ސަމާލުކަމަށް އައީ ގެދޮރުނެތް ފަޤީރު ބަޔަކަށް ބާކޯތަކެތި ގަނެގެން ޖަސްޓިން ބަހާ އެމީހުންނާއެކު ވަގުތު ހޭދަކުރާ މަންޒަރުތަކެވެ. ބައެއް މީހުން ބުނާގޮތުގައި ޖަސްޓިން އަށް ވަރަށް ބޮޑެތި ބަދަލުތަކެއް އަތުވެއްޖެއެވެ. އޭނާގެ ފަރާތުން މިހާރު ފެންނަނީ ތަސައްރަފު ފުދިފައި ހުރި ފިރިހެނެއްގެ ފަރާތުން ފެންނާންޖެހޭ ކަންކަން ކަމަށާއި، އިންސާނިއްޔަތުކަން އޭނާގެ ހިތަށް ވަދެއްޖެ ކަމަށެވެ.
ޖަސްޓިންގެ އާއިލާ އާއި ހަވާލާދީ ރިޕޯޓް ކޮށްފައިވާ ޚަބަރެއްގައި ބުނާގޮތުން ޖަސްޓިން ގަބޫލުކުރާ ގޮތުގައި ދިރިއުޅުމުގައި އޭނާއަށް ދެވަނަ ފުރުސަތެއް ލިބިއްޖެކަމަށާއި، ދެން އެ ފުރުސަތު ބޭކާރުކޮށްލުމަކީ އޭނާއަށް އަގު އަދާކުރެވޭނެ ކަމެއް ނޫންކަމަށެވެ.
