ސަރުކާރަށް ހުށަހަޅައިގެން ޙީލަތްތެރި ރޭވުމެއްގެ ދަށުން ފަޅު ރަށްތަކެއް އަތުލައިގަންނަން އެގްރޯނެޓުގެ މެނޭޖިންގ ޑިރެކްޓަރ ޙުސެއިން ދީދީ ޖެހި މަޅިފަތިން އެގްރޯނެޓް ސަލާމަތް ވެއްޖެއެވެ.

އެގްރޯނެޓުގެ މުވައްޒަފުންގެ ފަރާތުން މަޢުލޫމާތު ލިބިފައިވާ ގޮތުން، އެގްރޯ ނެޓަށް ދަނޑުވެރިކަން ކުރުމަށް ސަރުކާރުން ދޫކޮށްފައިވާ ހއ. މުލިދޫގައި ދަނޑުވެރިކަމުގެ މަޝްރޫޢެއް ހިންގުމުގެ ނަމުގައި ހަގީގަތް ނޭނގޭ ޗައިނާގެ ކުންފުންޏަކުން ޕްރޮޕޯސަލެއް ހުށަހެޅިއެވެ. މި ޕްރޮޕޯސަލްއަކީ ކުންފުނީގެ ރަސްމީ ގުޅުންތަކުގެ ބޭރުން، ކުންފުނީގެ މެނޭޖިންގ ޑިރެކްޓަރ ޙުސެއިން ދީދީ ކޮންމެވެސް އަމިއްލަ ފަރާތަކާ ގުޅިގެން ހޯދާފައިވާ ޕްރޮޕޯސަލެއް ކަމުގެ މަޢުލޫމާތު ލިބިފައެވެ.

މަޢުލޫމާތު ކަށަވަރުވެފައިވާ ގޮތުން، މި ޕްރޮޕޯސަލްގައި އޮތީ ޗައިނާގެ ގޮތް ނޭނގޭ ކުންފުންޏަކުން ކުރާ އިންވެސްޓްމަންޓެއްގެ ބަދަލުގައި އިންވެސްޓުކުރާ ކުންފުންޏަށް 99 އަހަރަށް ރާއްޖެއިން 7 ފަޅުރަށް ހިލޭ ދޭންޖެހޭނެ ކަމަށެވެ. މިޕްރޮޕޯސަލް އަކީ އޭގެ ޒާތުގައި ވެސް ސްކޭމްއެއް ކަމުން މި ޕްރޯޕަސަލާ ގުޅިގެން މާބޮޑު ސަމާލުކަމެއް ކުންފުނީގެ އިސް މުވައްޒަފުން ދީފައިނުވާ ކަމަށާއި ނަމަވެސް ސަރުކާރުން އެގްރޯނެޓު އުވާލަން ނިންމި ހިސާބުން ފެށިގެން އަނެއްކާ ވެސް އެގްރޯނެޓުގެ މޭޒުތައް މައްޗަށް، މި ޕްރޮޕޯސަލް އެރުވީ މެނޭޖިންގ ޑިރެކްޓަރ ޙުސެއިން ދީދީ އާއި ޖެނެރަލް މެނޭޖަރ މުޙައްމަދު ޝަޒީލް ކަމަށް އިތުބާރު ހުރި މަސްދަރުތަކުން ވަނީ މަޢުލޫމަތު ލިބިފައެވެ.

“ބޯޑަށްވެސް ފޮނުވި. އެމަކަމު މިއީ، ކަނޑައެޅިގެން އެބަ އެނގޭ ރާއްޖެއިން ހަތް ފަޅުރަށް ވަގުކުރަންވެގެން ޖެހި މަޅިއެއްކަން. މިކަހަލަ ކަންކަމެއް މިހާރަކު ނުހިނގާނެ ދެއްތޯ؟” ކުންފުނީގެ އިސް މުވައްޒަފެއް މި ނޫހަށް ކިޔައިދިނެވެ. “އައިޑެންޓިޓީވެސް ކަށަވަރުނުވާ މީހުން ފޮނުވާ އެއްޗެހި ހިފައިގެން މި އަންނަނީ. ފުރަތަމަ ޑިމާންޑަކީ ވެސް 99 އަހަރަށް ފަޅުރަށް ދިނުން” އެ މުވައްޒަފު އިތުރަށް ކިޔައިދިނެވެ.

އެގްރޯނެޓުގެ އެސިސްޓެންޓް ޖެނެރަލް މެނޭޖަރ ފާރޫޤު އަޙްމަދު ވިދާޅުވާ ބޮލުމެދަށް ހުޅިޖެހި މީހުން ގޮވައިގެން ކުންފުންޏެއް ނުހިންގޭނޭ ކަމަށް އެބުނާ ވާހަކަ ގޮސް ގުޅެނީ މި ޗައިނާ ކުންފުނީގެ ޕްރޮޕޯސަލްއާ އެވެ. އެގްރޯނެޓުގެ ޕޭރެންޓް ކުންފުނި ކަމަށްވާ ފަންޑް މެނޭޖްމަންޓުގެ މެނޭޖިންގ ޑިރެކްޓަރ އަޙްމަދު ނާޒިމަށް އަމާޒުކޮށް ބޭއަދަބީކޮށް ވާހަކަ ދެއްކީ ވެސް މި ޗައިނާ ކުންފުނިން ހުށަހެޅި ޕްރޮޕޯސަލްގައި ފުރިހަމަ ކުރަންޖެހޭ ބައިތައް ފުރިހަމަ ކުރުމަށާއި، ޤާނޫނާއި ޤަވާޢިދުގެ މަތިން ފުރިހަމަ ކުރަންޖެހޭ ކަންކަން ފުރިހަމަ ކުރުމަށް އަޙްމަދު ނާޒިމް އެންގެވުމުން ކަމަށްވެއެވެ. ނަމަވެސް ފުރިހަމަ ކުރަންޖެހޭ ކަންކަން އެގްރޯނެޓުން ފުރިހަމަ ކޮށްފައި ނުވާކަން ވަނީ ކަށަވަރުވެފައެވެ.