އިންސާނުންގެ ބޭނުންތަކަކީ ކޮޅާކޮޅު ނެތް ރާސްތާއެއްކަމަށް ޢިލްމީ ނަޒަރިއްޔާތުތަކުން ބުނެދެނީ ސަބަބެއް ނެތިއެއް ނޫނެވެ. އެކަމުގައި ޙަޤީޤަތްތަކެއް ވާތީއެވެ. ޝަކުވާތަކަކީ އަބަދުވެސް އިންސާނުންގެ ހިތުތެރޭގައި ހަށަގަންނަ ކަމެކެވެ. ޝަކުވާކުރުމާ މުޅިން ދުރުވުމީ އުނދަގޫ ކަމެއް ނަމަވެސް ޝަކުވާތައް މަދުކުރެވިދާނެއެވެ.
އިންސާނުންގެ ބޭނުންތަކަކީ ބަދަލުވާ ވެސް އެއްޗެކެވެ. އަދި އިންސާނުންގެ ބޭނުންތަކުގެ ދަރަޖައާއި ނިސްބަތަކީ ވެސް އަބަދު އެއްގޮތަށް އޮންނާނެ އެއްޗެއް ނޫނެވެ. މިސާލަކަށް، މީހަކު އެންމެ ބޭނުންވާ އެއްޗެއް ޙާޞިލުވުމުން، އެއަށް ވުރެ ބޮޑު ނުވަތަ މޮޅު ނުވަތަ އަގު ބޮޑު އެހެން އެއްޗަކަށް ހިތްކިޔައެވެ. އަދި އެކަމުގެ އުންމީދުގައި ހިތުގެ ޝަކުވާތައް ބޮނޑިބަނދެގެން އުޅެންޖެހެއެވެ. މިއީ އިންސާނާގެ ޙާލަތު ބަޔާންކޮށްދިނުމަށް ފަލްސަފާވެރިން ނަންގަވާ މިސާލެކެވެ.
އިންސާނީ ޟަރޫރީ ބޭނުންތަކުގެ އިތުރުން ޙަޔާތުގެ ފުރިހަމަކަމާއި، އަރާމާ ލައްޒަތު ޙާޞިލުކުރުމަށް ބޭނުންވާ ކަންކަން އިޤްތިޞާދީ ޢިލްމުގައި ދަރަޖަކުރެވެނީ ތަފާތު ގިންތިއެއްގައެވެ. އަދި އެއީ ނިމުމެއް ނެތް، ކޮޅާކޮޅު ނުފެންނަ ރާސްތާއެއް ކަމަށް ބަޔާންކުރެވިފައި ވެއެވެ.
މީލާދީ ސަނަތުން މިފެށުނު އައު އަހަރުގައި ޝަކުވާނުކުރާ ނުވަތަ ޝަކުވާ މަދުންކުރާ މީހަކަށް ވުމަށް ޢަޒުމް ކަނޑައެޅުމަކީ ބާއްޖަވެރި ޙަޔާތެއް ހޯދުމަށް އެދޭ ހަމަ ކޮންމެ މީހަކަށް ވެސް މުހިންމު ކަމެއް ކަމުގައި ދެކެމެވެ. ހުރިހާ ކަމެއް ފުރާ ފުރިހަމަ ނުވިކަމުގައި ވިޔަސް، ޝަކުވާނުކޮށް ކެތްތެރިކަމާއެކު ޝުކުރުކޮށްލެވިދާނެތެވެ.
