އިއްޔެގެ މެންދުރުފަހު 2:30 ގައި ބޯކޮށް ވާރޭވެހެން ފެށިގޮތަށް ހުއްޓުމެއް ނެތި 4 ގަޑިއެއްހާއިރު ވާރޭވެހުމުގެ ސަބަބުން ވަރަށް ބޮޑަށް ފެންބޮޑުވެ މަގުތަކަށް ނެރެފައިހުރި ކުނިތައް އޮޔާދާން ފެށިއެވެ. އެހެން ނަމަވެސް ވެމްކޯގެ މުވައްޒަފުންގެ ވަޒީފާގެ ޒިންމާ އަދާކުރުމުގައި ދެއްކެވީ ވަރަށް ވެސް ފުރިހަމަ ނަމޫނާއެކެވެ.
އެންމެ ބޯކޮށް ވާރޭވެހެމުންދިޔައިރު ވެސް ވެމްކޯގެ މުވައްޒަފުން ގެންދެވީ ޖަމާކޮށްފައިހުރި ކުނިތަކާ ގޭގޭގައި ހުރި ކުނިތައް ނެގުމުގެ މަސައްކަތް އެއްވެސް ހުއްޓުމެއް ނެތި ކުރައްވަމުންނެވެ. ބައެއް މުވައްޒަފުންނަށް ވިއްސާރަކޯޓެއް ވެސް ލިބިފައިނެތް ޙާލުގައި ތެމިފޯވެގެންނެވެ. އެމީހުން ބުނެދިނީ މިއީ އެމީހުން ވެސް ދިރިއުޅޭ ވެށިކަމާ ސާފުތާހިރުކޮށް ބެލެހެެއްޓުމަކީ އެމީހުންނަށް ވެސް ލިބޭ އުފަލެއް ކަމަށެވެ.
ވެމްކޯގެ އެޗްއާރުގެ ފަރާތުން ފިއްތުންތައް ކުރިމަތި ކުރަމުންދިޔަ ނަމަވެސް މުވައްޒަފުން މަސައްކަތްކުރެއްވުމުގެ ރޫޙަކަށް ބަދަލެއް ނާދެއެވެ. އެމީހުން މަސައްކަތް ކުރަނީ ޤައުމީ ވާޖިބެއްގެ ގޮތުގައި ބަލައިގެންނެވެ. ދިވެހިރާއްޖޭގެ ވެރިކަންކުރާ ފުރަމާލެ ސާފުކޮށް ބެލެހެއްޓުމަކީ ޤައުމީ މަސައްކަތެކެވެ. އެެމީހުންނަށް ޤައުމީ އިނާމެއް ޙައްޤު ނޫންތޯއެވެ.
