ބިލެތަކީ ދިވެހީން އާންމުގޮތެއްގައި ދުފަން ބޭނުންކުރާ އެއްޗެއް ނަމަވެސް އެއީ ހަމަ އެކަނި ދުފާލާފައި ދޫކޮށްލަން ހެޔޮވާވަރު އެއްޗެއް ނޫނެވެ. ދުފަން ބޭނުންކުރާ ފޯކަކީ ޞިއްޙީ ގޮތުން ގެއްލުން ބޮޑު އެއްޗެއް ކަމަށް ޑޮކްޓަރުން ކަށަވަރު ކޮށްދެއެވެ. އޭގައި އެކުލެވޭ “އެރެކް” އަކީ ގެއްލުން ބޮޑު ކެމިކަލްގެ ބާވަތެއް ކަމަށް ވެއެވެ.
އެހެން ނަަމަވެސް ބިލެތަކީ ގެއްލުންވާ އެއްޗެއް ކަމަށް އެއްވެސް ދިރާސާއަކުން އަދި މިހާތަނަށް ފެނިފައިނެތްތާ އެއީ ވަރަށް ގިނަ ފައިދާތަކެއް އެކުލެވޭ ފަތެއް ކަމަށް ހޯދުންތަކުން ވަނީ ކަށަވަރުވެފައެވެ. ފަތްޕިލާވެލީގެ ބޭސްފަރުވާއާ ގުޅޭ ހޯދުންތަކުން ދައްކާގޮތުގައި ބިލެތަކީ ވަރަށް ގިނަ ކަންކަމުގެ ފަރުވާއަށް ބޭނުންކުރެވިދާނެ ޤުދުރަތީ ފަތެކެވެ.
ބިލެތުން ވަރަށް ގިނަ ބަލިތަކަށް އެހީތެރިކަން ލިބޭކަމަށް ދިވެހިބޭސްވެރިން ވެސް ބުނެއެވެ. އެގޮތުން ބޮލުގެ ރިހުންތަކާއި، ކޮލެސްޓްރޯލާއި، ހަކުރުބައްޔާއި، ކެންސަރު ބައްޔާއި، ޑިޕްރެޝަނާއި، އާސްތުމާ އާއި، ވައިގެ އުނދަގޫތަކާއި، ބުރަކަށީގެ ތަދުތަކާއި، ޙަޖަމުގެ މައްސަލަތަކާއި، ހުޅުތަކުގައި ރިހުމުގެ މައްސަލަތަކާއި، ހަމުގެ މައްސަލަތަކާއި، ނޭވާލާ ނިޒާމުގެ މައްސަލަތަކާއި، ހިރުގަނޑުގެ މައްސަލަތަކާއި، ރޯގާ އާއި ކެއްސުމާއި، ނޭފަތުން ލޭ އައުމާއި ކަންފަތުގެ ރިހުމާއި، ކުޑަކަމުދާނިޒާމުގެ ބަލިތަކުގެ އިތުރުން ސަރުބީ ޖެހުމުގެ މައްސަލަތަކަަށް ރިލީފު ލިބޭ ބާވަތެއް ކަމަށް ހަކީމީ ބޭސްވެރިން ބުނެއެވެ.
ވީމާ، ދުފުން ފަދަ ގެއްލުންވާ އާދަތަކުން ދުރުހެލިވެ، ފައިދާ ލިބޭ ކަންކަމުގައި ބިލެތް ބޭނުންކުރުމަކީ ހެޔޮ ބަަދަލަކަށް ވެދާނެކަމަށް ބެލެވޭތީ މި މަޢުލޫމާތު ޙިއްސާކޮށްލީއެވެ.
