ދިވެހި ދައުލަތުގައި ހިމެނޭ ގިނަ ތަންފީޒީ އިދާރާތަކާއި ޔުނީފޯމް ބޮޑީތަކަށް ރައްޔިތުންކުރާ އިތުބާރު ކުޑަވާފަދަ ޢަމަލުތަކެއް ފެންނަމުންދާކަމީ ހިތާމަކުރަންޖެހޭ ވަރުގެ ބޮޑު މައްސަލައެކެވެ.

އެންމެފަހުން އިވިގެންދިޔައީ ކަސްޓަމްސްގެ ސީނިޔަރ އޮފިސަރުންތަކެއް ގުޅިގެން 400 މިލިޔަން ރުފިޔާއަށް ވުރެ ގިނަ ފައިސާ އެމީހުންގެ އަމިއްލަ އެކައުންޓްތަކުގައި ރޯލުކުރި ވާހަކައެވެ. މިވާހަކަތައް ފެތުރިފައި މިވަނީ ދާދި މިދާކަށް ދުވަހު، ކަރެކްޝަނަލް ސާވީސްގެ މުވައްޒަފުންތަކެއްގެ އެކައުންޓްގައި އެތައް މިލިޔަން ރުފިޔާއެއް ދައުރުކޮށްފައިވާތީ އެކަމުގެ ތުހުމަތުގައި ހައްޔަރުކޮށް ތަޙުޤީޤުކޮށްފައި ވަނިކޮށެވެ.

މަޢުލޫމާތު ލިބިފައިވާ ގޮތުގައި، އިމްޕޯޓު ޑިއުޓީ ނެގުމުގެ ތެރޭގައި ރިޝްވަތުގެ އަމަލުތަކެއް ހިންގާފައިވާ ކަމަށް ތުހުމަތު ކުރެވޭ ކަންކަމާ ގުޅުން ހުރެގެން ކަސްޓަމްސްގެ ތިން އޮފިސަރެއްގެ މައްސަލަ ފުލުހުން މިހާރު ގެންދަނީ ބަލަމުންނެވެ. އަދި، މި ތުހުމަތުގައި ކަސްޓަމްސްގެ 20 އޮފިސަރުން ޝާމިލުވެފައިވާ ކަމަށް އިސްބޭފުޅަކު ވަނީ ކަށަވަރު ކޮށްދެއްވާފައެވެ.

މި މައްސަލަ މިހާރު ވަނީ ރައްޔިތުންގެ މަޖިލިހުގެ 241 ކޮމިޓީ އަށް ވެސް ހުށަހަޅައިފަ އެވެ. އަދި ބައްދަލުވުންތައް ސިއްރު ކޮށްގެން ކަމާ ގުޅޭ އިދާރާތަކުގެ ބައެއް އިސްވެރިންނާ ސުވާލު ކޮށްފައިވެއެވެ.