މޫސުމީ އޮޔާ ވަޔާއެކު ށ. ނަރުދޫއަށް ދިމާވި ނުރައްކާތެރި އުދައެރުމުގެ ޙާދިސާއަށް ފަހު، މިހާރު ފެންނަނީ ހިތްދަތި މަންޒަރުތަކެކެވެ. ރަށުތެރޭގައި ލޮނުފެންގަނޑު ބޮޑުވުމުގެ ސަބަބުން ރަށުގެ ފެންފަށަލަ އެއްކޮށް ލޮނުވުމުގެ ސަބަބުން އެތައް ދުވަހެއްގެ މަސައްކަތުން ހެއްދި ގަސްތައް މިލާ މޯޅި ވަނީއެވެ.
ރަށުތެރޭގައި ހިނގާލުމުން ކުރިން ފެނުނު ފެހިކަން ގަދަ މަގުތަކުން މިއަދު ފެންނަނީ ޚަރީފު މޫސުމުގެ ގޮތުގައެވެ. މާބަޗީގާ ގަސްތަކާއި، މޭވާ އާއިި ތަރުކާރީ ގަސްތައް މަރުވެ ފަތްތައް ހިކިގެންދަނީއެވެ. ނަރުދޫން ވާހަކަދެއްކި މީހަކު ބުނިގޮތުގައި އޭނާ ދެއަހަރު ދުވަހުގެ މަސައްކަތުން ގޭދޮށުގައި ހެއްދި ހުރިހާ ބަގީޗާ ގަސްތަކާ މޭވާގަސްތައް ވަނީ އެއްކޮށް މަރުވެފައެވެ. އެއީ މާލީ ގޮތުންވެސް ވަރަށް ބޮޑު ގެއްލުމެއް ކަމަށާއިި، ތަފާތު ވައްތަރުތަކުގެ މުޑުވައް ހޯދީ ވަރަށް ބޮޑު ހޭދައެއް ކޮށްގެން ކަމަށެވެ.
މައެއް ހިސާބުތަކުގެ ފެންފަށަލަ އެއްކޮށް ވަނީ ލޮނުވެފައެވެ. އެހެންކަމުން މިކަމުން އަރައިގަންނަން ދުވަސްތަކެއް ނަގާފާނެ ކަމަށާއި، އެރަށަކީ ދަނޑުވެރިކަން ކުރާ ރަށަކަށްވާތީ، ރައްޔިތުންގެ އާމްދަނީއަށް ވަރަށް ބޮޑު ނޭދެވޭ އަސަރެއް ކުރާނެ ކަމަށެވެ. އެހެނީ ބައެއް ދަނޑުތަކަށް ލޮނު ވަނުމުގެ ސަބަބުން ވަނީ އެއްކޮށް ހަލާކުވެފައެވެ.
ނަރުދުއަށް އުދައަރަން ދިމާވި މައިގަނޑު ސަބަބަކީ އެރަށުގެ ބަނދަރުގެ ހެދުމުގެ މަސައްކަތް ނުނިމި އޮތުމެވެ. އެގޮތުން ކަނޑުތޮށި ނެތި ހާމައަށް އޮތުމުން ބޮޑެތި ރާޅުތައް ބިންދާލާގޮތަށް ރަށުތެރެއަށް އަރައިގެން ދިޔައެވެ. ނަތީޖާއެއްގެ ގޮތުން މުޅި ރަށުތެރޭގައި ލޮނުގަނޑު ބޮޑުވެ މީހުންގެ ގެދޮރަށާ މުދަލަށް ބޮޑެތި ގެއްލުންތަކެއް ލިބިފައިވެއެވެ.
