ދިވެހި އުމްރާވެރިން ހާލުގައި ޖެއްސި ގްރޫޕަށް އިސްލާމީ ކަންތައްތަކާއި ބެހޭ ވުޒާރާއިން  ވަރުގަދަ ޖޫރިމަނާތަކެއް ކޮށްފިއެވެ.

އިސްލާމީ ކަންތައްތަކާއި ބެހޭ ވުޒާރާއިން ޖޫރިމަނާކޮށްފައި ވަނީ އަލްހިޖްރަ ޓްރެވަލް އެންޑް ޓްއާރސް ޕްރައިވެޓް ލިމިޓެޑް ނަމަކަށް ކިޔާ ގުރޫޕެކެވެ. އެ ގުރޫޕުގެ ހަވާލުގައި އުމްރާއަށް ދިޔަ މީހުންގެ ތެރެއިން 23 މީހަކު ރާއްޖެ ނާދެވި ސައުދީގައި ތާށިވެފައިވާއިރު އެފަރާތްތަކަށް ދިވެހި ސަރުކާރުން މިހާރު ވަނީ އެހީތެރިކަން ފޯރުކޮށްދީފައެވެ.

މި ގުރޫޕުގައި ހަވާލުގައި އުމްރާއަށް ދިޔަ މީހުންގެ ތެރޭގައި ކުޑަކުދިންވެސް ހިމެނޭއިރު އެމީހުން އުމްރާއަށް ފުރީ ޑިސެމްބަރުގަ އެވެ. އަދި އެ ގްރޫޕުގެ ހަވާލުގައި އުމްރާއަށް ދިޔަ މީހުންނާއި މެދު ކަންތައް ކުރި ގޮތުން އެ ކުންފުންޏަށް ފިޔަވަޅު އަޅާނެ ކަން ރޭ ވަޒީރު ޑރ. މުހައްމަދު ޝަހީމް އަލީ ސަައީދު ވަނީ އިއުލާން ކުރައްވާފައެވެ.

އިސްލާމީ ކަންތައްތަކާ ބެހޭ ވުޒާރާއިން މިއަދު ބުނީ އަލްހިޖްރަ ގްރޫޕްގެ ހަވާލުގައި އުމްރާއަށް ދިއުމަށް އުމްރާވެރިން ދަތުރަށް ފައިސާ ދައްކާފައި ވީނަމަވެސް އެ ފައިސާއިން ޢުމްރާވެރިންގެ ދެކޮޅު ޓިކެޓު ހަމަނުޖައްސާ އެ ފައިސާ ކުންފުނީގެ އެހެން ކަންކަމަށް ބޭނުންކޮށްފައިވާ ކަމަށް އެ ކުންފުނިން އިއުތިރާފުވެފައިވާ ކަމަށެވެ.

އުމްރާވެރިން މައްކާއިން ރާއްޖެ އައުމަށް ޓިކެޓު ނަގާފައި ނެތުމުގެ ސަބަބުން ރާއްޖެ ނާދެވިގެން އެ އުމްރާވެރިން އެ ވުޒާރާގެ އެހީތެރިކަމަށް އެދިފައިވުމާ އެކު، ހާލުގައި ޖެހިފައި ތިބި އުމްރާވެރިން މިހާރު ހައްޖު ކޯޕަރޭޝަންގެ ބެލުމުގެ ދަށަށް ގެންގޮސްފައިވާ ކަމަށް އެ ވުޒަރާއިން ބުނެއެވެ.

އުމްރާވެރިން ހާލުގައި ޖެއްސި ގްރޫޕުން، ރާއްޖެއިން އުމްރާއަށް މީހުން ގެންދިޔުމާބެހޭ އުސޫލާއި ހިލާފުވެފައިވާތީ ފިޔަވަޅުތަކެއް އެޅުމަށް ވުޒާރާއިން ނިންމާފައި ވެއެވެ.

އެ ފިޔަވަޅުތަކަކީ؛

1- ރާއްޖެއިން ޢުމްރާއަށް މީހުން ގެންދިއުމަށް އެ ވުޒާރާއިން، އެ ގްރޫޕަށް ދޫކޮށްފައިވާ ހުއްދަ ހިފެހެއްޓުން

2- އެއްލައްކަ (-/100،000) ދިވެހި ރުފިޔާއިން އެ ގްރޫޕް ޖޫރިމަނާކުރުން

3- އެ ގްރޫޕް އަދި އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް ޢުމްރާއަށް މީހުން ގެންދިޔުމުގެ ހުއްދަނުދިނުން

4- އެ ގްރޫޕްގެ ފަރާތުން ޢުމްރާއަށް ގެންގޮސް ހާލުގައި ޖެހުނު މީހުން ރާއްޖެ ގެނައުމަށް އެ ވުޒާރާއިން ކުރި ހަރަދު އެ ކުންފިން ހޯދުން

5- މި މައްސަލަ ތަހުގީގުކޮށް ގާނޫނީ ފިޔަވަޅު އެޅުމަށް ފުލުހަށް ހުށަހެޅުން .

އިސްލާމީ ކަންތައްތަކާ ބެހޭ ވުޒާރާއިން ބުނީ، މި ފިޔަވަޅުތައް ތަންފީޒުކުރުމަށް ޓަކައި މެ ވުޒާރާއިން އިދާރީ ގޮތުންނާއި ގާނޫނީ ގޮތުން ކުރަން ޖެހޭ ހުރިހާ ކަންކަން ފަސްޖެހުމެއް ނެތި ކުރާނެކަމުގެ ޔަގީންކަން އަރުވާ ކަަމަށެވެ.