މިހާރު ކުރިއަށްދާ ގޯލްޑަން ފުޓްސަލް ޗެލެންޖުގެ ށ. އަތޮޅުގެ ބުރުގައި ރޭގައި ނަރުދޫ އާއި ބިލެތްފަހި ބައްދަލުކުރި މެޗް 3-2 ގެ ނަތީޖާއަކުން ބިލެތްފަހި ކާމިޔާބުކޮށްފިއެވެ.

ހުޅުމާލޭ ޓާފްދަނޑުގައި ރޭގައި ކުޅުނު ފޯރިގަދަ މެޗްގައި ދެޓީމުން ވެސް ނުރައްކާތެރި ހަމަލާތައް އުފައްދާފައި ވެއެވެ. އަބަދުވެސް ނަރުދޫ ފާހަގަކުރެވެމުން އަންނަނީ ފުޓްބޯޅައިގާ ށ. އަތޮޅުގެ ގަދަ ބާރެއްގެ ގޮތުގައެވެ. އަދި ބިލެތްފަހި ފާހަގަކުރެވެނީ އަރަމުން އަންނަ ތަރިއެއްގެ ގޮތުގައެވެ.

ރޭގެ ފޯރިގަދަ މެޗް ކުޅެވެމުންދިޔަ އިރު، ދެ ޓީމުގެ ވެސް ގިނަ އަދަދެއްގެ ސަޕޯޓަރުން ދަނޑަަށް ވަދެ ތިބިކަން ފާހަގަކުރެވެއެވެ. އަދި މި މެޗްގެ ފޯރި ގަދަވާނެކަން އެނގޭތީ މެޗް ބެލުމަށްޓަކައި އަތޮޅުގެ އެހެން ރަށް ރަށުގެ ގިނަ އަދަދެއްގެ މީހުންވެސް ދަނޑަށް ވަދެފައި ވެއެވެ.

މި މެޗްގައި ބިލެތްފައްސަށް ލަނޑު ކާމިޔާބުކޮށްދިނީ އާދަމް ޝަފްރާޒް އާއި، އިބްރާހިމް އިމާން އާއި، އަޙްމަދު އިބްރާހީމް އެވެ. އަދި ނަރުދޫ ޓީމުން ކާމިޔާބުކުރީ ދެ ލަނޑު ޖަހާފައިވަނީ މުޙައްމަދު ނާއިޒް އާއި ވިޝާމް އާރިފް އެވެ. މި މެޗްގެ މޮޅު ކުޅުންތެރިޔަކަށް ހޮވިފައިވަނީ ބިލެތްފަހީ ޖާޒީ ނަންބަރު 88 އިބްރާހީމް އިމާންއެވެ.