މި ޖަނަވަރީ މަހުގެ 13 އިން 16 އަށް އެސްޓޯނިޔާގެ ރައީސް ޑރ. އަލާރް ކަރިސްގެ ދަޢުވަތަކަށް އެގައުމަށް ދަތުރުފުޅެއް ކުރައްވަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވައިފި ކަމަށް ރައީސުލްޖުމްހޫރިއްޔާގެ އޮފީހުން ހާމަކޮށްފިއެވެ. ދުވަހަކުވެސް ދިވެހިރާއްޖޭގެ ރައީސަކު ރަސްމީ ދަތުރުފުޅެއް ކުރައްވާފައި ނުވާ އެސްޓޯނިޔާއަށް ރައީސް ޑރ.މުޢިއްޒު މި ކުރައްވާ ދަތުރުފުޅުގައި ސަމާލުކަން ދެއްވާނީ، އެއް ޤައުމުން އަނެއް ޤައުމަށް އެއްބާރުލުން ދިނުމާއި، ޑިޖިޓަލް، ސައިބަރ އަދި އީ-ގަވަރނަންސް، މޫސުމީ ބަދަލާއި ތިމާވެށީގެ މައްސަލަތަކުގެ އިތުރުން ސައިންސާއި ތަޢުލީމާ ގުޅޭ ދާއިރާތަކުން ދެ ޤައުމަށް އެކުގައި ކުރެވިދާނެ ކަންކަމުގެ މައްޗަށް ކަމަށް ރައީސް އޮފީހުން މަޢުލޫމާތު ދެއެވެ.

އެސްޓޯނިޔާގެ ފަތިފުށަށް ބަލާއިރު، ދުނިޔޭގެ ތާރީޚުގައިވެސް މިހާތަނަށް ހިންގި އެންމެ ބޮޑު މަނީލޯންޑަރިންގެ އަމަލު ހިންގި ޑެންމާރކްގެ މަޝްހޫރު ބޭންކެއް ކަމުގައިވާ ޑަންސްކާ ބޭންކުގެ ބުރާންޗެއް އެސްޓޯނިއާގައި ހުރެއެވެ. 2007 ވަނަ އަހަރުން ފެށިގެން 2015 ވަނަ އަހަރާ ހަމައަށް އެބޭންކުން ކުރި މުޢާމަތްތަކުގެ ތެރެއިން 200 ބިލިޔަން ޔޫރޯގެ ފައިސާ ލޯންޑާރ ކުރުމުގައި އެންމެ އިސް ދައުރެއް އަދާކުރީ އެސްޓޯނިއާގައި ހުންނަ މި ބުރާންޗުންނެވެ. މި މައްސަލަ ތަޙުޤީޤުކޮށް ޖިނާއީގޮތުން ޒިންމާވާންޖެހޭ ފަރާތްތައް ހޯދުމަށާއި، އެސްޓޯނިޔާގެ މާލީ ނިޒާމުގައި ކަޅު ފައިސާ ދައުރުކުރުން ހުއްޓުވުމުގެ ގޮތުން 50 މިލިޔަން ޑޮލަރުގެ އެހީތެރިކަމެއް އެމެރިކާއިން ފޯރުކޮށްދީފައިވާ ކަމަށް މި ޖަނަވަރީ މަހުގެ 8 ވަނަ ދުވަހު ރޮއިޓާރސް އިން ރިޕޯޓުކޮށްފައިވެއެވެ.

އިޤްތިޞާދު ބޯވަތަށް ވެއްޓި، ބޭރު ފައިސާއަށް ދިވެހިރާއްޖެ ޖެހިފައިވާ މިފަދަ ދަނޑިވަޅެއްގައި ރައީސްގެ އެސްޓޯނިޔާގެ ދަތުރުފުޅުން ކުރިއެރުންތަކެއް ހާޞިލުކުރެވިދާނެ ކަމަށް ސަރުކާރަށް ތާޢީދުކުރާ ފަރާތްތަކުން އަންނަނީ ބުނަމުންނެވެ.