އަލިރަސްގެފާނުގެ ޒިޔާރަތުގެ ތެރޭގައި ސައިކަލެއް ޕާކުކޮށްފައި ހުރުމުން، އެއީ އަލިރަސްގެފާނުގެ ދުއްވަވަން ގެންގުޅުއްވި ސައިކަލުތޯ ސުވާލުކޮށް ސޯޝަލް މީޑިޔާގައި ފޮޓޯއެއް ޢާންމު ވެއްޖެއެވެ. އަލިރަސްގެފާނު ޒިޔާރަތް ނިސްބަތްވަނީ އައްސުލްޠާނު ޢަލީ ހަވަނައަށެވެ. ދިވެހި ތާރީޚުން އެނގޭގޮތުގައި އަލި ރަސްގެފާނަކީ މީލާދީން 1557 ން 1558 އަށް ދިވެހިރާއްޖޭގެ ރަސްކަން ކުރެއްވި ރަދުންނެވެ.

ޢަލީ ރަސްގެފާނުގެ ޒިޔާރަތަކީ ޢަލީ ރަސްގެފާނު އަރިހުގައި ޕޯޗުގީޒުންނާ ދެކޮޅަށް ނިކުމެ އެންމެ ފަހުވަގުތާއި ޖެހެންދެން އެކުއެކީގައި ހަނގުރާމަކޮށް ޝަހީދުވި ބޭފުޅުން ފަސްދާނު ލެވުނު ތަނެވެ. މީހުން ބުނެއުޅޭގޮތުން އެބޭފުޅުން ޝަހީދުވެ ވަޑައިގެންފައިވަނިކޮށް ފެނިގެން އެ ބޭފުޅުން ޝަހީދުވެފައި ތިއްބެވި ތަނުގައި ފަސްދާނުލީ އެވެ. މިހާރު މަޝްހޫރު ނަމުންނަމަ، އެތަން ހުންނަނީ މާފަންނު ޝަހީދު އަލީ ހިނގުމުގައެވެ.

ދިވެހިރާއްޖެގައި ހުންނަ ތާރީޚީ މިފަދަ މަގުބަރަކާތަކާއި އިމާރާތްތަކަށް ޒަމާނީ ދިވެހިން ސަމާލުކަންދޭ މިންވަރު ވަރަށް ކުޑައެވެ. ނަމަވެސް ޒުވާނަކަށް އަލި ރަސްގެފާނު ޒިޔާރަތުން ސައިލެއް ފެނުމުން މަޖަލަކަށްވިޔަސް މިވަނީ ވަރަށް ތަފާތު މެސެޖެއް އެކުލެވޭ ފޮޓޯއެއް ސޯޝަލް މީޑިއާގައި ހިއްސާ ކޮށްފައެވެ.