ރައީސް މައުމޫނު އުފެއްދެވި ހުރިހާ ސިޔާސީ ޕާޓީތަކެއް އިލެކްޝަންސް ކޮމިޝަނުން އުވާލައިފިއެވެ. ރައީސް މައުމޫނުގެ ޒަޢާމަތުގެ ދަށުން އެންމެ ފުރަތަމަ އުފެއްދެވީ ޑީއާރުޕީއެވެ. 2008 ވަނަ އަހަރު ބޭއްވި ރިޔާސީ އިންތިޚާބު ރައީސް މައުމޫނަށް ނާކާމިޔާބުވެވަޑައިގަތް ހިސާބުން، ޑީއާރުޕީގެ އެތެރެގެއިން ޕާޓީގެ ބާރުތައް ހޯއްދަވަން މަސައްކަތް ކުރެއްވި ބޭފުޅުންގެ މެދުގައި ކޯޅުން ބޮޑުވެ، ރައީސް މައުމޫން ޑީއާރުޕީ ދޫކޮށްލައްވައި އުފެއްދެވީ ޕީޕީއެމް އެވެ. ޕާޓީ އުފެއްދިތާ މާގިނަ ދުވަސްތަކެއްނުވެ، ޕީޕީއެމުން ވެރިކަމަށް އައެވެ. އެއީ 2013 ވަނަ އަހަރުގެ ރިޔާސީ އިންތިޚާބު ރައީސް މައުމޫނުގެ ކޮއްކޯފުޅު ރައީސް ޢަބްދުﷲ ޔާމީނު ޕީޕީއެމް ޓިކެޓުގައި ކާމިޔަބު ކުރެއްވުމުންނެވެ. މާގިނަ ދުވަސްތަކެއް ނުވެ، ރައީސް މައުމޫނާއި ރައީސް ޔާމީނާ މައްސަލަޖެހި، ރައީސް މައުމޫން ޕީޕީއެމުން ބޭރުކުރައްވައި، ހުރިހާ ބާރުތަކެއް ރައީސް ޔާމީން ނަންގަވައިފިއެވެ. ދެބޭފުޅުންގެ ސިޔާސީ ކޯޅުންގަނޑު ނިމުނުއިރު މައުމޫނު ހުންނެވީ ޖަލުގައެވެ. މައުމޫނު ޖަލުން ނުކުމެ ވަޑައިގަތްއިރު 2018 ވަނަ އަހަރުގެ ރިޔާސީ އިންތިޚާބުން ބަލިވެ، ރައީސް ޔާމީންގެ ވެރިކަން ނިމިއްޖެއެވެ. ރައީސް މައުމޫނު އަނެއްކާވެސް އިތުރު ހިތްވަރުފުޅަކާއެކު މޯލްޑިވްސް ރިފޯމް މޫވްމަންޓުގެ ނަމުގައި ސިޔާސީ ޕާޓީއެއް 2019 އަހަރު ރަޖިސްޓަރީ ކުރެއްވިއެވެ.
ރައީސް މައުމޫނު އެންމެ ފުރަތަމަ އުފެއްދެވި ސިޔާސީ ޕާޓީ ކަމުގައިވާ ޑީއާރުޕީ 2013 ވަނަ އަހަރުގެ ރިޔާސީ އިންތިޚާބު ނިމުނުއިރު އޮތީ އޮޔާ ބެހިގެން ގޮސްފައެވެ. ޑީއާރުޕީގައި ތިއްބެވި ރައީސް މައުމޫނަށް ހީލަތް ހެއްދެވި ބޭފުޅުން އެމްޑީޕީއަށާއި އެކިދިމާލަށް ގޮސް ހުސްވެއްޖެއެވެ. އޭގެފަހުން ސިޔާސީ ޕާޓީއެއްގެ ސިފާގައި ޑީއާރުޕީ ހިނގާފައި ނެތެވެ. މިގޮތުން ދިވެހި ފިރިހެނުންތަކެއް އެމީހެއްގެ އަވާގައި ޖެހުނު އަލަމް ގިރީގެ ކޮޓަރިއަށް ބިޒްނަސް މީޓިންއަކަށް ވަޑައިގެންނެވި މަޝްހޫރު ސިޔާސީ ބޭފުޅެއްވެސް ޑީއާރުޕީ ގެންގުޅުއްވިއެވެ. އޭގެ ފަހުން އައީ އެހެން މަރުހަލާއެކެވެ. މީހުން ކިޔާގޮތުން، ރައްޔިތުންގެ މަޖިލީހުގެ ކާށިދޫ ދާއިރާގެ ކުރީގެ މެމްބަރު އަދި މަޝްހޫރު ވިޔަފާރިވެރިޔާ ޢަބްދުﷲ ޖާބިރު ޑީއާރުޕީ ބައްލަވައި ގަތީއެވެ. ނަމަވެސް، ޢަބްދުﷲ ޖާބިރަށްވެސް ޕާޓީ ނުހިންގެވި، އެންމެފަހުން ގާނޫނީ ޢަދަދަށް ޕާޓީގައި މެމްބަރުން ނެތުމުގެ ސަބަބުން 2023 ވަނަ އަހަރު އިލެކްޝަންސް ކޮމިޝަނުން ޑީއާރުޕީ އުވާލިއެވެ. މިހިސާބުން ރައީސް މައުމޫން އުފެއްދެވި ސިޔާސީ ޕާޓީތައް އުވާލުމުގެ ސިލްސިލާ ފެށުނީއެވެ. މާގިނަ ދުވަސްތަކެއްނުވެ، މޯލްޑިވްސް ރިފޯމް މޫވްމަންޓުން އުވާލުމުގެ މަސައްކަތްވެސް އިލެކްޝަންސް ކޮމިޝަނުން ފެއްޓިއެވެ. ޤާނޫނީ އަދަދަށް މެމްބަރުން ހަމަނުވެގެންނެވެ. އެ ޕާޓީ އުވާލީ 29 ޖަނަވަރީ 2025 ގައެވެ. 30 ޖަނަވަރީ 2025 ގައި އުވާލެވުނީ ރައީސް މައުމޫނު އުފެއްދެވި ދެވަނަ ސިޔާސީ ޕާޓީ ކަމުގައިވާ ޕީޕީއެމްއެވެ. ޕީޕީއެމް އުވާލީ އެޕާޓީން އެދިގެންނެވެ.
ކޮންމެއަކަސް ރައީސް މައުމޫނު އުފެއްދެވިހާ ސިޔާސީ ޕާޓީތަކެއް އިލެކްޝަންސް ކޮމިޝަނުން މިވަނީ އުވާލާފައެވެ. ރައީސް މައުމޫނަށް ސަޕޯޓުކުރާ ފަރާތްތަކުން އެމަނިކުފާނު އަދިވެސް ސިޔާސީ ޕާޓީއެއް އުފައްދަވާނެ ކަމަށް އުންމީދު ކުރެއެވެ. އެއީ ދުރުކަމެއް ނޫންކަމަށް ބައެއްފަރާތްތަކުން ދެކެއެވެ.
