މާބަނޑު އަންހެނަކު ބަލިވެގެން ގއ. އަތޮޅު ހޮސްޕިޓަލަށް ޑަކުޓަރަށް ދެއްކުމަށްޓަކައި އިއްޔެގެ ވަގުތެއްގައި ގެންދިއުމުން އެނދުމަތިކޮށް އެކަށީގެންވާ ފަރުވާ ނުލިބި، އެތައް ވަގުތެއް ބޭކާރުވެ ބަލިމީހާގެ ޙާލަތު އިތުރަށް ގޯސްވެ، ދެމައިންގެ ފުރާނަވެސް ވަނީ ގެއްލިފައެވެ.
މަޢުލޫމާތު ލިބިފައިވާ ގޮތުގައި، އަންހެން މީހާގެ ފުއްޕާމޭގާ ފެންހެދިފައި ހުރިކަން ހޮސްޕިޓަލަށް ބެލުނީވެސް އަދި އެނގުނީ ވެސް އެކަމުގެ ފަރުވާ އޭނާއަށް ދެވޭހާ ވަގުތު ދިޔަ ފަހުންކަމަށެވެ. އަދި އިތުރު ފަރުވާއަށް ބަލިމީހާ މާލެ ގެންދެވޭތޯ އުފުލަންޖެހުނު ތަކުލީފު ބަލިމީހާގެ ފިރިމީހާ ކިޔައިދިންއިރު އަޑުއެހި މީހަކުވެސް ހިތްފަަޅައިގެންދާނެއެވެ. ފިރިމީހާ ބުނެފައިވަނީ އަނބިމީހާގެ ފުރާނަދިޔައީ ފުލައިޓަށް އަރުވަން ގެންގޮސް، އަރުވަން ހުއްދަ ނުލިބި، ފުލައިޓުގެ ކުރިމަތީގައި ތިއްބާ ރަންވޭ މައްޗަށް ކަމަށެވެ.
ގއ. އަތޮޅު ހޮސްޕިޓަލުގައި ސިޒޭރިއަން ހެދީވެސް ސަލާމަތްކުރެވޭނީ ދެމައިންކުރެ އެކެއް ކަމަށް ނިންމައި، ފިރިމީހާ އިޤުރާރުކުރުމަށް ފަހުގައެވެ. ފިރިމީހާ އެދުނީ އެ ޙާލަތުގައި އަނބިމީހާ ސަލާމަތްކޮށްދިނުމަށެވެ. އެގޮތުން އޮޕަރޭޝަން ކޮށްގެން ދަރިފުޅު ނެގި އިރުވެސް ބޭބީގެ ހަރަކާތް ހުއްޓިފައިވާ ކަމަށާއި، ވިންދުހުރިކަން ފިޔަވައި އިތުރު އެއްވެސް ހަރަކާތެއް ނެތްކަމަށެވެ. އަދި އަންހެން މީހާގެ އޮކްސިޖަން ލެވެލް ކުޑަކޮށް ރަނގަޅުވެލާފައި އަނެއްކާ ދަށަށް ގޮސް ނޭވާނުލެވޭ ވަރުވެގެން ވެންޓިލޭޓަރަށް ލާންޖެހުނެވެ. އަދި އެމަޖެންސީކޮށް މާލެ ގެންދަން އެންގި ކަަމަށެވެ. މާލެ ގެންދަން ކުރި މަސައްކަތް ކާމިޔާބު ނުވެ އުޅެނިކޮށް އެންމެ ފަހުން އެއާޕޯޓު ރަންވޭމަތީގައި މައިމީހާގެ ފުރާނަވެސް ދިޔައީއެވެ.
މުޅި ޙާދިސާއަށް ބަލާއިރު، މިކަމުގައި އިހުމާލުތައް ވަރަށް ގިނައެވެ. އެގޮތުން ގއ. އަތޮޅު ހޮސްޕިޓަލާއި، އާސަންދަ ކުންފުންޏާއި މޯލްޑިވިއަންގެ އިހުމާލުވެސް އޮތްކަން ފާހަގަކުރެވެއެވެ. މިއީ ވަރަށް ރަނގަޅު ތަޙުޤީޤެއް ކުރެވި އިންސާފު ލިބެންޖެހޭނެ މުހިންމު މައްސަލައެކެވެ.
