ފެމެލީ ކޯޓުން އިއްޔެ މަޖިލީހުގެ ކޮމިޓީއެއްގެ ބައްދަލުވެމެއްގައި ތިން ފިރިއަށް ކައިވެނިކޮށްގެން އުޅޭ އަންހެނެއްގެ ވާހަކަ ވަނީ ދައްކާފައެވެ. ފެމެލީ ކޯޓުން ދެއްކި ވާހަތަކާ ގުޅިގެން އެންމެންވެސް ތިބީ ހައިރާންވެ އަންތަރީސް ވެފައެވެ. ބައެއް މީހުން ބުނާގޮތުން އެކަހަލަ ކަންކަން ދިމާވަނީ ވަރިކައިވެނީގެ ކަންކަމަކީ ވަރަށް އާދައިގެ ކަންކަމަށް މީހުން ދެކޭތީއެވެ. ހަމަ ތިބެފައި ކައިވެނިކޮށް، ވަރިކޮށް ހަދާތީއެވެ. އަނެއް ބަޔަކު ތިބީ ތިން ފިރިޔަށް ކައިވެނިކޮށްގެން އުޅޭ އަންހެންމީހާގެ ކުޅަދާނަކަމާމެދު ހައިރާންވެފައެވެ. އަންހެންމީހާ ހަމަ މީހުންނާ އިންނަން މޮޅީ ކަމަށް ބުނެ ބައެއް މީހުން އެކަން މަޖަލަކަށް ހަދައިގެން ވާހަކަ ދައްކާފައިވެއެވެ. އިތުރު ބަޔަކު ބުނިގޮތުން އެ އަންހެންމީހާ މީހަކާ އިނީ އަމިއްލައަކަށް ނޫނެވެ. އޭނަގެ ތިން ފިރިންވެސް އެބަތިއްބެވެ. އެމީހުންގެ ވާހަކައެއް ބަޔަކު ނުދައްކައެވެ.

މީގެ އިތުރުން ހައިރާންވާންޖެހޭ އެހެން ކަމެއްވެސް އެބައޮތެވެ. އަންހެނަކު މީހަކާ އިނދެގެންހުރެ، އިތުރު ކައިވެންޏެއް ކުރުމަކީ ދިވެހިރާއްޖޭގައި ޖިނާއީ ކުށެކެވެ. އެކަން އެހެން ކަނޑައެޅިފައި އޮތީ ދިވެހިރާއްޖޭގެ ޤާނޫނުލްއުޤޫބާތުގައެވެ. ނަމަވެސް އަންހެނަކު ތިން ފިރިން ތިބިކަން އެނގިފައިވީމަނަމަވެސް، އެ މައްސަލަ ތުހުމަތު ކުރެވޭ ކުށެއްގެ ގޮތުގައި ތަހުގީގުކޮށް ބެލުމަށް ކަމާބެހޭ އިދާރާތަކަށް ފޮނުވާފައިވާކަން ނުވަތަ ނޫންކަންވެސް ނޭނގެއެވެ. އެފަދަ މައުލޫމާތެއް އިއްޔެއްގެ ބައްދަލުވުމުގައި ފެމެލީ ކޯޓުން ހާމަކުރިކަން ސާފެއް ނޫނެވެ. ތިންފިރިއަށޭ މިލިޔުމުގައި މިބުނަނީ އެއްވެސް ހާލެއްގައި އަންހެނަކަށް ތިންފިރިއަށް ކައިވެނި ކުރެވޭނެތީ އެއްނޫނެވެ. ނަމަވެސް މިދިމާވެގެން އުޅޭ ކަންތައް ސިފަވާގޮތަކީ އެއީ ކަމުގައިވާތީ، އެ އިބާރާތް ލިޔުނީއެވެ.

ދިވެހިރާއްޖޭގެ ޤާނޫނުލްޢުޤޫބާތުގެ 410 ވަނަ މާއްދާގެ (ހ) ގައި ކުށުގެ ޙާލަތްތައް ބަޔާންކޮށްފައިވާ ނަންބަރު ތަކުގެ ތެރެއިން 4 ވަނަ ނަންބަރުގައި އޮންނަނީ މީހަކާ އިނދެގެން ހުރި އަންހެނާ އިތުރު ކާވެންޏެއް ކުރުމަކީ ކުށެއް ކަމަށެވެ. މިކަން ފެމެލީ ކޯޓުގެ ބޭފުޅުންނަށްވެސް އެނގިލައްވާނެއެވެ. އެހެންނަމަވެސް މިފަދަ ޙާލަތްތަކުގައި ޖިނާއިގޮތުން ތަހުގީގެއް ހިންގުމަށް ނުވަތަ އެ މައްސަލަ ބެލުން އޮންނަނީ ކޮން އުޞޫލަކުން ކަމެއް ރަނގަޅަށް ސާފެއް ނޫނެވެ. އެކަންވެސް އެނގެން އެބަޖެހެއެވެ. ދިމާވެގެން އުޅޭ ފަދަ މައްސަލަތަކުގެ ސަބަބުން ނަސަބު އޮޅުމުގެ މައްސަލަތައް ދިމާވެދާނެ ކަމަށް ފެެމެލީ ކޯޓުން ބުނެފައިވެއެވެ. އަދި އެކަމުގައި ފެމެލީ ކޯޓުގެ ކަންބޮޑުވުން އޮތްކަންވެސް ދެއްކި ވާހަކަތަކުން އެނގެއެވެ. އެންމެންވެސް ތިބީ ހަމަ ކަންބޮޑުވެފައެވެ. ނަމަވެސް މި މައްސަލަ ޖިނާއީ ގޮތުން ބެލިފައި ނުވާނަމަ، އެއީ އަދި އިތުރަށް ކަންބޮޑުވާންޖެހޭ ކަމެކެވެ.