ޗީފް ޖުޑީޝަލް އެޑްމިނިސްޓްރޭޓަރ ގެ މަޤާމަށް ދިވެހިރާއްޖޭގެ ޤާނޫނީ ދާއިރާގައި ފާހަގަކޮށްލެވޭ ތައުލީމާއި ތަޖުރިބާ ލިބިފައިވާ ބޭފުޅަކު ކުރިމަތިލައްވާފައިވަނިކޮށް އެމަގާމަށް އެބޭފުޅާއާ ވާދަވެސް ނުކުރެވޭވަރުގެ ފަރާތެއް ހޮވައިފިއެވެ. އެމަގާމަށް ކުރިމަތިލެއްވި އަލްއުސްތާޛު އަޙްމަދު މާޖިދު ސޯޝަލް މީޑިޔާގައި ފާޅުކޮށްފައިވާ ޝުޢޫރުތަކުން އެނގޭގޮތުން، ޗީފް ޖުޑީޝަލް އެޑްމިނިސްޓްރޭޓަރ ގެ މަގާމަށް ހޮވިފައިވާ އަލްއުސްތާޛު އަމްޖަދު މުޞްތަފާއަކީ އުސްތާޛު މާޖިދުގެ ދަރިވަރެކެވެ. މަގާމަށް ހޮވިފައިވާ އުސްތާޛު އަމްޖަދު މީގެކުރިން އިލެކްޝަންސް ކޮމިޝަނުގެ ނައިބުރައީސް ކަމާއި ވަޒީފާއާބެހޭ ޓްރައިބިއުނަލުގައި މަސައްކަތްކުރައްވާފައެވެ. ވަޒީފާއާބެހޭ ޓްރައިބިއުނަލުގެ ރައީސް ކަމުގެ މަގާމުގައި ހުންނަވާފައިވާ އެމަގާމުން އިސްތިއުފާ ދެއްވީ ޕްރޮފެޝަނަލް މާހައުލެއް ނެތްކަމަށް ވިދާޅުވެ 2020 ވަނަ އަހަރުގެ ޖުލައި މަހުގައެވެ.

އަލްއުސްތާޛު އަޙްމަދު މާޖިދުއަކީ ޝަރީޢާ އެންޑް ލޯވ އިން ޑިގްރާ އާއި މާސްޓާސް ހައްދަވާފައިވާ ބޭފުޅެކެވެ. ދިވެހިރާއްޖޭގެ ހައިކޯޓާއި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި ދިވެހިރާއްޖޭގެ ސުޕްރީމް ކޯޓާއި ދިވެހިރާއްޖޭގެ ޖުޑީޝަލް އެކަޑަމީ ހިމެނޭހެން މި ހަތަރު މުއައްސަސާގައި 10 އަހަރުގެ މުއްދަތަކަށް ފަންނީ އަދި އިދާރީ އިސް ވަޒީފާތަކުގައި މަސައްކަތްކުރައްވާފައިވާ ވަރަށް ގިނަބައެއްގެ ލޯތްބާއި އިހްތިރާމް ލިބިލައްވާފައިވާ އިލްމީ ބޭފުޅެކެވެ.

އަލްއުސްތާޛު މާޖިޖު ޖުޑީޝަލް އެކަޑަމީގެ ޗާންސެލަރގެ ގޮތުގައި މަސައްކަތްކުރެއްވި ދުވަސްވަރު އެ އެކަޑަމީއިން ވަނީ ޝަރުޢީ ދާއިރާގެ މުވައްޒަފުންނާއި ފަނޑިޔާރުންނަށް ޚާއްޞަކޮށްގެން 50 ވަރަކަށް ތަމްރީނު ޕްރޮގްރާމް ހިންގަވައި މުހިންމު މަސައްކަތްތަކެއް ކުރައްވާފައެވެ. މީގެއިތުރުން ރާއްޖޭގެ ޝަރުޢީ ދާއިރާ ހަރުދަނާ ކުރުމުގެ ގޮތުން، ދުނިޔޭގެ އެތަށް ގައުމަކަށް ވަޑައިގެން ބުރަ މަސައްކަތްތަކެއް ކުރައްވާފައެވެ. މި މަސައްކަތްތަކުގެ އިތުރުން، ވަރަށް ގިނަ މުހިންމު ޢިލްމީ މަސައްކަތް ކުރައްވާފައިވާކަން އުސްތާޛު މާޖިދު މިއަދު ފޭސްބުކުގައި ޢާންމުކޮށް ހާމަކުރައްވާފައިވާ ޝުޢޫރުތަކުން އެނގެއެވެ.

އުސްތާޛު މާޖިދު ވިދާޅުވެފައިވަނީ، ޝަރުޢީ ދާއިރާގައި ކުރެވުނު މަސައްކަތްތަކާއެކުވެސް، އަލްއުސްތާޛު އަމްޖަދު މުޞްޠަފާއާ އެއްވަރެއްގެ ޤާބިލިއްޔަތެއް ތަޢުލީމާއި ތަޖުރިބާގެ ގޮތުން އެބޭފުޅާގެ ކިބައިގައި ނެތް ކަމީ، އަދި އިންޓަރވިއުގައި އަލްއުސްތާޛު އަމްޖަދު މުޞްޠަފާ އާ އެއްވަރަކަށް ޕާރފޯރމް ނުކުރެވުނު ކަމީ، އުސްތާޛު މާޖިދު މި ހުރިހައި ދުވަހަކު ކުރެއްވި ކަންކަން އެއްވެސް މާނައެއް ނެތް، ތާކުންތާކު ނުޖެހޭ، ބޭކާރު މަސައްކަތްތަކެއް ވެފައިވާ ކަމަށެވެ. އަދި ”މި ކަންކަން ކުރިޔަސް ޙަޤީޤަތުގައި މިއިން ކަމެއްގެ ޢިލްމީ އަދި ފިކުރީ ޤާބިލުކަން އަޅުގަނޑުގެ ނެތްކަމާއި، އަޅުގަނޑުގެ ދަރިވަރު އަލްއުސްތާޛު އަމްޖަދު މުޞްޠަފާ އަކީ އަޅުގަނޑާ އަޅައިކިޔާ އިރު އާދަޔާ ޚިލާފު ޤާބިލިއްޔަތެއްގެ ވެރިއެއްކަން ސާބިތު ވެގެން ދިޔަ ކަމެކެވެ. ވީމާ، އަޅުގަނޑުގެ ޙަޤީޤީ ޙާލަތާއި ފެންވަރު އަޅުގަނޑަށް އަންގަވައިދެއްވިކަމަށް ޓަކައި ޖުޑީޝަލް ސަރވިސް ކޮމިޝަނަށް ޝުކުރު ދަންނަވައި، އަލްއުސްތާޛު އަމްޖަދު މުޞްޠަފާއަށް ތަހުނިޔާ ދަންނަވަމެވެ. އޭނާގެ ޤިޔާދަތުގައި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި ޝަރުޢީ ދާއިރާގެ އިދާރީ ނިޒާމަށް ކުރިއެރުންތަކާއި ތަރައްޤީ އަންނާނޭ ކަމަށް އުއްމީދު ކުރަމެވެ.“ އަލްއުސްތާޛު އަޙްމަދު މާޖިދު އެބޭފުޅާގެ ފޭސްބުގައި އިތުރަށް ލިޔުއްވާފައިވެއެވެ.