ދިވެހިރާއްޖޭގައި އަދުލު އިންސާފު ޤާއިމުކުރުމުގެ ބާރުގެ އެންމެ މަތީ ކޯޓު ކަމުގައިވާ ދިވެހިރާއްޖޭގެ ސުޕްރީމް ކޯޓުގެ ބެންޗު ބަދަލުކުރުމަކީ ވެރިކަމުގެ ނިޒާމުގެ ތެރޭގައި ހިންގޭ އާންމު ކަމަކަށް ވެއްޖެއެވެ.
ޒަމާނީ ޑިމޮކްރެސީއަށް ރާއްޖެ ކުރަމުން މިދާ ދަތުރުގައި މިހާތަނަށް އައި އެއްވެސް ސަރުކާރަކުން ސުޕްރީމް ކޯޓާ ނުތޮޅި ދޫކޮށްލައްވާފައެއް ނެތެވެ. ދިގު 30 އަހަރުގެ ޚުދުމުޚުތާރު ވެރިކަން ބަދަލުކުރީ ޒަމާނީ ޑިމޮކްރެސީގެ ފޮނިމީރުކަން ހޯދުމަށްޓަކައެވެ. އަދި މިހާތަނަށް ޑިމޮކްރެސީން ދިވެހީންނަށް ގިއްޗެއްހާ ހަމަވެސް ލިބިފައެއް ނެތޭ ދެންނެވުމަކީ ކުށަކަށް ނުވާނެއެވެ. މައި ތިންބާރާ ހަތަރު ވަނަ ބާރު ވެސް މަސްހުނިވެފައިވާ ތަން ނޫންތަނެއް އަދި ފެނިފައެއް ނެތެވެ.
ރައްޔިތުންގެ މަޖިލިސް ވެސް އޮންނަންޖެހެނީ ސަރުކާރަށް ބޭނުންހާ ކަމެއް، ބޭނުންހާ ގޮތަކަށް ކުރެވޭ ތަނެއްގެ ގޮތުގައެވެ. ސުޕްރީމް ކޯޓު ވެސް އޮންނަންޖެހެނީ ސަރުކާރުގެ މުހުތާދުތައް ފުއްދައިދޭ އާރުކާޓީއެއްގެ ގޮތުގައެވެ. ނޫސްވެރިކަން ކުރާ ފަރާތްތައް ވެސް ތިބެންޖެހެނީ ސަރުކާރަށް ސަނާކިޔާ ބައެއްގެ ގޮތުގައެވެ. ކަންމިހެން ހުރުމާއެކު، ތިން ބާރުން ކުރެ ވަކި މިވީ ފަހެ ކޮން ބާރެއްތޯއެވެ. ކަންހިނގާ ގޮތަށް ބަލާއިރު، ހުރިހާ ވެސް ބާރެއް އޮތް ފަރާތަކީ ހަމައެކަނި ރައީސުލްޖުމްހޫރިއްޔާ ނޫންތޯއެވެ.
ސުޕްރީމް ކޯޓުގެ ފުއްގަނޑު މޮޑެނީ ވަކި ޕާޓީއެއްގެ ވަކި ސަރުކާރެއް ނޫނެވެ. ޑިމޮކްރެސީއަކަށް ވެރިކަން ފުރޮޅާލި ފަހުން މިހާތަނަށް އައި ކޮންމެ ސަރުކާރަކުން ވެސް ސުޕްރީމް ކޯޓާ ކުޅެފައި ވެއެވެ. ރައީސް މުޙައްމަދު ނަޝީދުގެ ސަރުކާރުގައި ވެސް ސުޕްރީމް ކޯޓާ ކުޅެހަދާފައި ވެއެވެ. ރައީސް ޔާމީން އަބަދުލް ޤައްޔޫމްގެ ސަރުކާރުގައި ވެސް ސުޕްރީމް ކޯޓުގެ ބެންޗު ބަދަލުކޮށްފައި ވެއެވެ. އޭގެ ފަހުން ދެން އައި ރައީސް އިބްރާހީމް މުޙައްމަދުު ޞާލިޙުގެ ސަރުކާރުން ވެސް ސުޕްރީމް ކޯޓަށް ބަދަލުތައް ގެނެސްފައި ވެއެވެ. މިއަދު ފެނިގެން މިދަނީ މިހާރު މިއޮތް ރައީސް ޑރ. މުޙައްމަދު މުޢިއްޒުގެ ސަރުކާރުން ވެސް ސުޕްރީމް ކޯޓުގެ ބެންޗު ބަދަލުކުރާ މަންޒަރެވެ. އެއްވެސް ތަފާތެއް އަދި އިސްތިސްނާއެއް ނެތްގޮތުގައި ހުރިހާ ސަރުކާރުތަކުން އެންމެ ކުޅެން ބޭނުންވާ ތަނަކަށް މިވީ ހަމަ ދިވެހިރާއްޖޭގެ ސުޕްރީމް ކޯޓު ނޫންތޯއެވެ.
