ބައެއް މީހުންނަކީ ދަރަންޏަށް މީހުންގެ އަތުން މުދަލާ ފައިސާ ހޯދުމަށް ފަހު، އެކި އެކި ބަހަނާތަކުގައި ދަރަނި އަދާނުކޮށް، އެއްވެސް ބިރެއްނެތި ދުނިޔޭގެ ޙަޔާތް ވޭތުކޮށްލާ އަބާއްޖަވެރިންނެވެ. އަނެއް ބަޔަކީ ކިތަންމެ ކުއްލިގޮތަކަށް ފައިސާފޮއްޗެއް ލިބުނުކަމުގައި ވިޔަސް، އޭގެ ކުރިން ނަގާފައިވާ ދަރަނިތައް އަވަހަށް ކަނޑާލާ މީހުންނެވެ. އެއީ ދަރަނީގެ ބިރުވެރިކަމުން ސަލާމަތް ވުމަށްޓަކައި އަތްމަތި ހުސްވިޔަސް ހެޔޮ ކަމަށް ޙައްޤުތައް އަދާކުރާ ދެ ދުނިޔޭގެ ބާއްޖަވެރީންނެވެ.
މި ފަނާވަނިވި ދުނިޔޭގައި މީހުންނަށް އަނިޔާވެރިވެ، ޣީބަ ބުނެ އާޑަ ފުރައްސާރަކޮށް، ޙައްޤުތަކަށް އަރައިގަތްފައިވާ ނަމަ، ޤިޔާމަތްދުވަހު އޭގެ ބަދަލަށް ޒިންމާވާން ޖެހޭނެއެވެ. ދުނިޔެމަތީގައި ދަރަނި ނުދައްކާ ފިލައިގެން އުޅެވުނަސް އެދުވަހުން ހަމަ ހިލާ ސަލާމަތެއް ނުވެވޭނެއެވެ.
ދަރަނި އަދާނުކޮށް އޮތުމަކީ އެމީހެއްގެ ހެޔޮ އަމަލުތަކުން އެ ދަރަނި އަދާކުރަންޖެހޭނެ ކަމެކެވެ. އަދި ހެޔޮ ޢަމަލެއް ނެތްނަމަ ނުވަތަ ކުރެވިފައިވާ ހެޔޮ އަމަލުތަކުން ނުފުދިއްޖެ ނަމަ، އެމީހެއްގެ ނުބައި ޢަމަލުތަކާ ޙަވާލުވާން ވެސް ޖެހޭ ކަމެކެވެ. އެހެން ކަމުން ވަގުތު ފާއިތު ވުމުގެ ކުރިން ދަރަނިތައް އަދާކުރާށެވެ.
ރަސޫލު ﷲ ﷺ ޙަދީޘްކުރެއްވިއެވެ. ”ބަނގުރޫޓުވެފައިވާ މީހަކީ ކާކުކަން ތިޔަބައިމީހުންނަށް އެނގިލައްވާތޯއެވެ؟“ އެހިނދު ޞަޙާބީ ބޭކަލުން ދެންނެވިއެވެ. އަހުރެމެންގެ ތެރޭގައި ބަނގުރޫޓު ވެފައިވާ މީހަކީ އެމީހެއްގެ އަތުގައި ދިރުހަމެއް މުދަލެއް ނެތް މީހާއެވެ.
ދެން ފަހެ ރަސޫލު ﷲ ﷺ ޙަދީޘްފުޅު ކުރެއްވީ މިހެންނެވެ.
”ހަމަކަށަވަރުން ތިމަންކަލޭގެފާނުގެ އުންމަތުގައި ބަނގުރޫޓުވެފައިވާ މީހަކީ، ޤިޔަމާތްދުވަހު (ﷲގެ ޙަޟުރަތަށް) އަންނައިރު ނަމާދާއި، ރޯދައާއި، ޒަކާތާއި، (މިފަދަ ހެޔޮޢަމަލުތަކާއިގެން އަންނަހިނދު ދުނިޔެމަތީގައި) މިވެނި މީހާއަށް މަލާމަތްކޮށްފައި، އެވެނި މީހާގެ ބޮލުގައި ޒިނޭގެ ތުހުމަތު އަޅުވާފައި، މިވެނި މީހާގެ މުދާ ކައިފައި، އެވެނި މީހާގެ ލޭ އޮހޮރުވާފައި، މިވެނި މީހާގެ ގައިގައި ޖަހާފައި، އަންނަ މީހާއެވެ. ދެންފަހެ އޭނާގެ ހެޔޮ ޢަމަލުތައް މިވެނި އެވެނި މީހަކަށް ދީފައި، އޭނާގެ ހެޔޮ ޢަމަލުތައް ހުސްވާއިރުވެސް އޭނާގެ ފަރާތުން އަނިޔާ ލިބިފައިވާ މީހުންގެ ޙައްޤު އަދާ ނުވާތީ، އެންމެ ފަހުން އެމީހާގެ ނުބައިކަންތައްތައް ބޮލުއަޅަންޖެހޭ މީހާއެވެ. ދެންފަހެ އޭނާ ނަރަކައިގެ ތެރެއަށް އެއްލާލެވޭނެތެވެ.“
ކުރިއަށް އޮތީ އަޅުކަމާ ތަޤުވާގެ މައްސަރެކެވެ. ބަރަކާތްތެރި ވެގެންވާ ރަމަޟާން މަހެވެ. ޙައްޤުތައް އަދާކޮށް ތައުބާ ވާށެވެ. ރަމަޟާން މަހުގެ ދަރުމައާ ޘަވާބު ލިބިގަތުމަށްޓަަކައި ފުރިހަމައަށް ތައްޔާރު ވުމުގެ ގޮތުންނެވެ.
