މިލައުތުރު

ދިރާގުގެ ނަމުގައި ފޭސްބުކްގައި ބޮޑު ސްކޭމެއް، އޭގައި ނުޖެހޭތި!

ދެ އަހަރަށް ވުރެ ގިނަ ދުވަސްވެފައިވާ ލެޕްޓޮޕްތައް ދިރާގުން ހަދިޔާކުރާ ޕްރޮމޯޝަނެއް ކަމަށް ބުނެ ބަޔަކު ފޭސްބުކްގައި ހިންގަނީ ބޮޑު ސްކޭމެއްކަން ހާމަވެއްޖެއެވެ. އެއީ ދިރާގާ އެއްވެސް ގުޅުމެއް ހުރި ކަމެއް ނޫންކަން މިލައުތުރަށް ވަނީ ކަށަވަރުވެފައެވެ.

”ލެޕްޓޮޕް އޭޒް އަ ގިޕްޓް“ ގެ ނަމުގައި ހިންގާ ޕްރޮމޯޝަނަކީ ބޮޑު އޮޅުވާލުމެކެވެ. އޭގައި ބުނާގޮތުން އެންމެ 29 ރުފިޔާ ދެއްކުމުން ސީދާ ގެއަށް ލެޕްޓޮޕެއް ފޮނުވައިދެއެވެ.

ޕްރޮމޯޝަނެއްގެ ގޮތުގައި ފޭސްބުކްގައި ބަޔަކު ހިންގާ މި ސްކޭމްގައި ސީދާ ދިރާގުގެ ނަން ބޭނުންކޮށްފައި ވެއެވެ. އަދި ދިރާގަކީ ވަރަށް ބޮޑު ލެޕްޓޮޕް ޑީލަރެއްގެ ގޮތުގައި ސިފަވާގޮތަށް އިޝްތިހާރު ކޮށްފައި ވެއެވެ.

ލެޕްޓޮޕް ލިބޭ ޕްރޮމޯޝަނާ ގުޅޭ ޕޯސްޓްގެ ކޮމެންޓް ސެކްޝަނުގައި ގިނައީ ބޭރުމީހުންގެ ކޮމެންޓްތަކެވެ. އެމީހުންެގެ ކޮމެންޓްތަކުގައި ބުނެފައިވަނީ ލެޕްޓޮޕް ލިބިއްޖެ ކަމަށާއި، އެކަމާ އުފާވި ވާހަކައެވެ. އެހެން ނަމަވެސް ކޮމެންޓުކުރާ ހުރިހާ ދިވެހީން ވެސް ބުނެފައިވަނީ މިއީ ބޮޑު އޮޅުވާލުމެއް ކަަމަށެވެ.