މުޝްފިގް ނަމަކަށް ކިޔާ މި ޒުވާނާ ގެއްލިފައި ވަނީ މާލެ ދަތުރު ކުރަމުން ދަނިކޮށް ވަރަށް ބޮޑަށް އަލިފާން ރޯވެގެން އަޑިއަށް ދިޔަ ”ހޮޅުދޫ ބޯޓު“ ނަމަކަށް ކިޔާ މުދާ އުފުލާގައި ބޯޓުން ކަނޑަށް ފުންމާލި މީހުންގެ ތެރެއިން ގެއްލިގެންނެވެ.

ލ.މާވަށަށް އުފަން އުމުރުން އެންމެ 25 އަހަރުގެ މުޝްފިގް ދަތުރުކުރަމުން ދިޔައީ ލ. މާވަށަށް ނިސްބަތްވާ ބޯޓަކުންނެވެ. މި ބޯޓުން ޖުމްލަ 18 މީހަކު ދަތުރު ކުރިއެވެ. އޭގެ ތެރެއިން މުޝްފިގް ފިޔަވާ އެންމެން ވަނީ ސަލާމަތް ކޮށްފައެވެ. ރެއިން ފެށިގެން މުޝްފިގް ހޯދުމުގެ މަސައްކަތް ދަނީ ކުރަމުންނެވެ.

އެ އޮޕަރޭޝަންގެ އަދާހަމަ ހާމަކުރަމުން މިރޭ އެމްއެންޑީއެފް އިން ބުނީ، ސަރފޭސް ސަރޗްގެ ގޮތުގައި 53.04 ސްކުއެއާ ނޯޓިކަލް މޭލް ބަލާފައިވާ ކަމަށެވެ. މިގޮތުން އަންޑަރވޯޓަރ (ޑައިވިންގ) ސަރޗްގެ ގޮތުގައި 64،240 އަކަމީޓަރު ބަލާފައިވާއިރު، ވައިގެ މަގުން 1،545 ސްކުއެއާ މޭލް (4000 އަކަމީޓަރު) ބަލާފައިވާ ކަމަށް އެމްއެންޑީއެފް އިން ބުންޏެވެ.

އެ ބޯޓު އަޑިއަށް ދިޔައީ ރޭ ދަންވަރު 02:07 ހާއިރެވެ. ބޯޓުގެ ބައިތައް އޮޔާދާތީ، އެ ސަރަހައްދުން ދަތުރުކުރާ ފަރާތްތަކުން މިކަމަށް ސަމާލުކަން ދިނުމަށާއި ރޭގަނޑު މި ސަރަހައްދުން ދަތުރުކުރާ ފަރާތްތަކުން ޚާއްސަ ސަމާލުކަމެއް ދިނުމަށް އެމްއެންޑީއެފުން ވަނީ އިލްތިމާސްކޮށްފައެވެ.