ށ. ފޯކައިދޫގެ އާބާދީ 2000 އަށް އަރައިފި ކަމަށް ފޯކައިދޫ ކައުންސިލުން އިޢުލާން ކޮށްފިއެވެ.

ފޯކައިދޫ ކައުންސިލުން ފޯކައިދޫގެ ރައްޔިތުންނަށް މަރުޙަބާ ކިއުމަށް ފަހު ބުނެފައިވަނީ ރަށުގެ އާބާދީ ދެހާހަށް އަރައިފި ކަމަށެވެ. މަޢުލޫމާތު ލިބޭގޮތުގައި ފޯކައިދޫ އަކީ ށ. އަތޮޅުގައި އެންމެ ހަލުވިކަމާއެކު އާބާދީ އިތުރުވަމުންދާ އެއް ރަށެވެ. އަދި ނިސްބަތުން ޒުވާން އާބާދީއެއް އޮތް ފޯކައިދޫ އަކީ އުމްރާނީ ގޮތުން ވެސް ފާހަގަކޮށްލެވޭ ރަށެކެވެ.

މިހާރުގެ އާބާދީގެ ތަފާސްހިސާބުތަކަށް ބަލާއިރު، އަންހެނުންގެ ނިސްބަތަކީ %51 އެވެ. ފޯކައިދޫގެެ ޖުމުލަ އާބާދީ އެކުލެވެނީ 1009 އަންހެނުންނާއި، 991 ފިރިހެނުންނެވެ. އެހެން ކަމުން މިވަގުތަށް ޖުމުލަ އަންހެނުންނާ ޖުމުލަ ފިރިހެނުންގެ ތަފާތަކީ 18 އެވެ.

ރާއްޖޭގެ ގިނަ ހިސާބުތަކުގައި އަންހެނުންގެ އާބާދީއަށް ވުރެ ފިރިހެނުންގެ އާބާދީ އިތުރު ވަމުންދާކަން ވަނީ ފާހަގަ ކުރެވިފައެވެ. އެހެން ނަމަވެސް ފޯކައިދޫގެ އާބާދީގައި އަދި ފެންނަނީ އަންހެނުން އިތުރުކޮށެވެ.