އަވައްޓެރި އިންޑިޔާއިން ރާއްޖެއަށް އެތެރެކުރަން އުޅުނު 59 މިލިއަން ރުފިޔާގެ މަސްތުވާތަކެތި އެ ގައުމުން އަތުލައިގަނެފިއެވެ.
އިންޑިޔާއިން މިތަކެތި އަތުލައިގެންފައި ވަނީ، އިންޑިއާގެ ކޯސްޓުގާޑާއި ޑިރެކްޓޮރޭޓް އޮފް ރެވެނިއު އިންޓެލިޖެންސް ގުޅިގެން ހިންގި ހާއްސަ އޮޕަރޭޝަންއެއްގައެވެ.
މި ހާދިސާއާ ގުޅިގެން އިންޑިއާގެ ބައެއް ނޫސްތަކުން ރިޕޯޓުކޮށްފައިވާ ގޮތުގައި އެ އޮޕަރޭޝަން ހިންގީ ޓުޓިކޮރިން ބަނދަރުން މާލެ އަށް މަސްތުވާތަކެތި ޓްރެފިކް ކުރަން އުޅޭ ކަމަށް ޑިރެކްޓޮރޭޓް އޮފް ރެވެނިއު އިންޓެލިޖެންސަށް ލިބުނު ރިޕޯޓަކާ ގުޅިގެންނެވެ.
އިންޓެލިޖެންސް ރިޕޯޓާ ގުޅިގެން މިދިޔަ ބުދަ ދުވަހު އިންޑިއާގެ ކޯސްޓު ގާޑުގެ ދެ އުޅަނދަކުން، މަސްތުވާތަކެތި އުފުލި ބޯޓު ހިފެހެއްޓީ ގަލްފް އޮފް މަންނާއިންނެވެ. އެއީ ޓަމިލްނާޑޫ އާއި ސްރީ ލަންކާއާ ދެމެދު އޮންނަ ސަރަހައްދެކެވެ.
މި މަސްތުވާތަކެެއްޗާ އެކު ދަތުރުކުރި އުޅަނދު އަތުލައިގަތް އިރު، އޭގައި ނުވަ މީހަކު ތިއްބެވެ. އުޅަނދު މިހާރު އޮތީ ޓުޓިކޮރިން ބަނދަރުގަ އެވެ.
މި އުޅަނދުން ފެނިފައި ވަނީ މަސްތުވާތަކެތީގެ ބާވަތެއް ކަމަށްވާ 30 ކިލޯގެ ހަޝިޝް އޮއިލް އެވެ.
