ޣައްޒާގެ ރައްޔިތުން ބޭރުކޮށްފައި އެތަން ތަރަައްޤީކުރާނީ އެމެރިކާއިން ކަމަށް ބުނެ ރައީސް ޑޮނާލްޑް ޓްރަމްޕު އެކުލަވާލި ޕްލޭން ޤަބޫލުނުކުރާނެ ކަމަށް ބުނެ، އަރަބި ޤައުމުތަކުން އެކުލަވާލި ޣައްޒާ އާރާސްތުކުރުމުގެ ޕްލޭނަށް ޔޫރަޕުގެ ބައެއް ބޮޑެތި ޤައުމުތަކުން ވެސް ތާއީދު ކޮށްފިއެވެ.
އަރަބި ޤައުމުތަކުން ޣައްޒާ އާރާސްތުކުރުމަށް 53 ބިލިޔަން ޑޮލަރު ކަނޑައަޅާފައި ވެއެވެ. އަދި އެމެރިކާގެ ރައީސް ޓްރަމްޕުގެ ހުށަހެޅުން ޤަބޫލުނުކުރުމަށް ވެސް ނިންމާފައި ވެއެވެ. އަރަބި ޤައުމުތަކުގެ ޕްލޭނަށް ތާއީދުކުރާކަން މިހާތަނަށް ހާމަކޮށްފައި ވަނީ އިނގިރޭސި ވިލާތާއި، ފަރަންސޭސި ވިލާތާއި، ޖަރުމަނު ވިލާތުގެ އިތުރުން އިޓަލީއެވެ. އެ ޤައުމުތަކުގެ ޚާރިޖީ ވަޒީރުން ވިދާޅުވެފައިވަނީ ޣައްޒާ ތަރައްޤީކުރުމުގެ ފުރުޞަތު ދިނުން އެންމެ އައުލާކަން ބޮޑީ އަރަބި މުސްލިމް ޤައުމުތަކަށް ކަމަށާއި، ގުޅިފައިވާ އަރަބި ޤައުމުތަކުގެ ޕްލޭނަށް ތާއީދުކުރައްވާ ކަމަށެވެ.
ސައުދީ އަރަބިޔާގެ އިސްނެގުމުގެ ދަށުން އެކުލަވާލާފައިވާ ޣައްޒާ އާރާސްތުކުރުމުގެ ޕްލޭނަށް އިނގިރޭސި ވިލާތް ފަދަ ޤައުމުތަކުން ތާއީދުކުރުން ވެގެންދާނީ ރައީސް ޓްރަމްޕަށް ބޮޑު ގޮންޖެހުމަކަށް ކަން ޔަޤީނެވެ. އަދި ޓްރަމްޕު ބޭނުންވާފަދަ އަމިއްލަ ތަނަކަށް ޣައްޒާ ހެދުމަށް ކުރަމުން ގެންދާ އުންމީދުތައް ނާކާމިޔާބުވާނެ ކަމެކެވެ. އެހެން ނޫނަސް އަރަބި ޤައުމުތަކުން ތިބީ ރައީސް ޓްރަމްޕަށް އެފުރުޞަތު ދޭގޮތަކަށް ވެސް ނޫނެވެ. އެހެނީ އެއީ އެމެރިކާ ވިލާތާ ބެހޭވެސް ތަނެއް ނޫނެވެ.
އިސްރާޢީލުގެ ޔަހޫދީ ދައުލަތުން ކެނޑިނޭޅި ފަލަސްޠީނަށް އަތްގަދަކުރުމަށް އެކި ގޮތްގޮތުން މަސައްކަތް ކުރަމުން ގެންދެއެވެ. އެމެރިކާއަކީ އަބަދުވެސް އެމީހުންގެ އެންމެ ބޮޑު މަދަދުގާރަށް ވަނީ ވެފައެވެ. އެހެން ނަމަވެސް ފަލަސްޠީނުގެ މިނިވަންކަމަށް ޖިހާދުކުރާ މުޖާހިދުންގެ ހިތްވަރު ގަދަކަމުން ޔަހޫދީންނަށް އެތަން ހިފޭގޮތެއް ނުވެއެވެ. މިހާރު ކުރިއަށް ގެންދާ އަސްކަރީ ޙަމަލާތަކުގައި މުޅި ޣައްޒާ ފުނޑު ފުނޑުކޮށް ބިމާ ހަމަކޮށްލުމުން ވެސް ހަމާސް ޖަމާޢަތުގެ މުޖާހިދުން އަމާންދީފައެއް ނުވެއެވެ. އަދި އެމީހުންގެ ހިތްވަރާ ހަރުދަނާ އަޤީދާ ބަލިކަށި ވެގެން ގޮސްފައެއް ވެސް ނުވެއެވެ. އެމީހުން ކުރިންވެސް އަދި މިހާރުވެސް ބުނަމުން ގެންދަނީ އުފަން ފަސްގަނޑުން ބޭރުކޮށް ނުލެވޭނެ ކަމަށެވެ. މާތް ﷲ ގެ ހެޔޮ ރަޙްމަތްފުޅުން ޣައްޒާގެ މިނިވަންކަމަށް ޖިހާދުކުރަމުން ގެންދާ މުޖާހިދުންނަށް ނަސްރާއި ފަލާޙާ ކާމިޔާބު މިންވަރުކުރައްވާށި. އާމީން!