ނިރުބަވެރި އިސްރާއީލުން ފަލަސްތީނުގެ ޣައްޒާއަށް ދެމުންދާ ހަމަލާތައް ދިވެހި ސަރުކާރުން ކުށްވެރިކޮށްފި އެވެ.
އިސްރާއީލުން ޣައްޒާއަށް ހަމަލާތައް ދޭން އަލުން މި ފެށީ ހަމަލާތައް މެދުކަނޑާލުމަށް މިދިޔަ ޖެނުއަރީގައި އިސްރާއީލާއި ހަމާސް ޖަމާއަތާއި ދެމެދު އެއްބަސްވުމަކަށް އައިސްފައިވަނިކޮށެވެ.
އިސްރާއީލުން އެ އެއްބަސްވުމާ ހިލާފުވެ، އެއްވެސް އިންޒާރެއް ވެސް ކުރިން ދިނުމެއް ނެތި ޣައްޒާގެ އެކި ސަރަހައްދުތަކަށް ވަނީ ރޭ ވައިގެ ހަމަލާތައް ދޭން ފަށައިފަ އެވެ. މި ހަމަލާތަކުގަައި 400 އަށް ވުރެ ގިނަ މީހުން ޝަހީދުވިއިރު، އޭގެ ތެރޭގައި ގިނަ އަދަދެއްގެ ކުޑަކުދިން ހިމެނެ އެވެ.
މިކަމާ ގުޅިގެން ރާއްްޖޭގެ ފޮރިން މިނިސްޓްރީން ނެރުނު ބަޔާނެއްގައި ބުނީ، އިސްރާއީލުން ޣައްޒާގެ އެކި ސަރަހައްދުތަކަށް ދިން ވަރުގަދަ ވައިގެ ހަމަލާތަކުގައި ފަލަސްތީނުގެ ކުށެއްނެތް ތުއްތު ކުދިން ހިމެނޭހެން 400 އަށްވުރެ ގިނަ މީހުން ޝަހީދުކޮށްލުން ހަރުކަށި އިބާރާތުން ކުށްވެރި ކުރާ ކަމަށެވެ.
މި ބަޔާނުގައި މިނިސްޓްރީން ވަނީ މާތްވެގެންވާ ރަމަޟާން މަހުގައި ދިން އެ ހަމަލާއަކީ ސުލްހައިގެ އެއްބަސްވުމާއި ބައިނަލްއަގްވާނީ އިންސާނީ ހައްގުތަކާއި އިންސާނީ ޤާނުނުތަކާއި މުޅިން ހިލާފުކަމެއް ކަމަށް ބުނެފަ އެވެ.
އިތުރު ހަމަނުޖެހުމަކަށް ދިޔުމަށް ފުރުސަތު ނުދީ އަދި ކުށެއް ނެތް އާންމުންނަށް ރައްކާތެރިކަން ލިބޭނެކަން ކަށަވަރުކުރަން ބައިނަލްއަގުވާމީ މުޖުތަމައު އަށް ފޮރިން މިނިސްޓްރީން ވަނީ ގޮވާލާފަ އެވެ. އަދި އިޒްރޭލުގެ އަމަލުތަކަށް އެގައުމު ޖަވާބުދާރީކުރުވަން ވެސް މިނިސްޓްރީން ވަނީ ގޮވާލާފަ އެވެ.
އެމެރިކާގެ ހަތިޔާރާއެކު އިސްރާއީލުން ޣައްޒާއަށް ހަމަލާދޭން ފުރަތަމަ ފެށީ 2023 ވަނަ އަހަރު އޮކްޓޫބަރު މަހުގެ ހަތް ވަނަ ދުވަހުއެވެ. އެ ހަމަލާތަކުގައި ޣައްޒާ އިން 48،000 އަށް ވުރެ ގިނަ މީހުން ވަނީ ޝަހީދުވެ، 111،630 މީހަކަށް އެކި ވަރުގެ އަނިޔާތައް ވަނީ ލިބިފަ އެވެ.
