ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދަރިކަލުންނާ ގުޅޭ ގޮތުން އެމްޑީޕީގެ އާންމު މެންބަރެއްކަމަށްވާ މަރިޔަމް ޒުބައިރު ދެއްކި ވާހަކަތަކާ ގުޅިގެން އޭނާގެ މައްޗަށް ދިވެހިރާއްޖޭގެ ފަސްޓް ލޭޑީ ސާޖިދާ މުޙައްމަދު އަބުރުގެ ދައުވާކުރައްވައިފިއެވެ. މިއީ ދިވެހިރާއްޖޭގެ ތާރީޚުގައި ވެސް ހުށަހެޅޭ މިފަދަ ފުރަތަމަ މައްސަލައެވެ.

ފަސްޓް ލޭޑީގެ ފަރާތްޕުޅުން ވަކާލާތުކުރާ ޤާނޫނީ ވަކީލު އާޒިމާ ޝަކޫރުގެ ލޯފާމް އިން މިއަދު ނެރުނު ބަޔާނެއްގަައިވާ ގޮތުން އެ މައްސަލަވަނީ ސިވިލް ކޯޓަށް ހުށަހަޅަފައެވެ. އަދި ބަޔާނުގައި ވަނީ ރައީސްގެ ދަރިކަލުން އުމައިރު މުހައްމަދު މުއިއްޒަށް ނިސްބަތްކޮށް އެމްޑީޕީގެ އެއްވުމެއްގައި މަންދީ ދެއްކި ވާހަކަތަކުގެ ސަބަބުން، އުމައިރުގެ ފުރާނަ ގެއްލިދާނެ ހާލަތެއް މެދުވެރިކުރުވައި، އުމައިރުގެ ކިޔެވުމަށާއި މުސްތަގުބަލަށް ބޮޑެތި ގެއްލުންތަކެއް ކުރިމަތިވާނެ ހާލަތެއް މެދުވެރިކުރުވާފައިވާ ކަމަށެވެ. އަދި އޭގެ ސަބަބުން ކުޑަކުދިންގެ ހައްގުތައް ރައްކާތެރިކުރުމުގެ ގާނޫނާއި ކުޑަކުދިންގެ ހައްގުތައް ރައްކާތެރިކުރުމާ ބެހޭ ބައިނަލްއަގްވާމީ މުއާހަދާ އިން ކަށަވަރުކޮށްދީފައިވާ ރައްކާތެރިކަމާއި ކަރާމާތް ނަގާލާފައިވާ ކަމަށެވެ.

ވީމާ ގާނޫނުއަސާސީން ކަށަވަރުކޮށްދީފައިވާ ނަމާއި އަބުރު ރައްކާތެރިކުރުމުގެ ހައްގު ނިގުޅައިގެންފައިވާތީ އުމައިރުގެ މަންމަގެ ހައިސިއްޔަތުން ފަސްޓް ލޭޑީ ސާޖިދާ މުޙައްމަދުގެ ފަރާތްޕުޅުން ސިވިލް ކޯޓަށް މިއަދު މައްސަލަ ހުށަހަޅާފައިވަނީ ލިބުނު ގެއްލުންތަކުގެ މާއްދީ ބަދަލު ހޯދުމަށް ކަމަށް ބެލެވެއެވެ.