ދުންފަތް ކޮންޓްރޯލުކުރުމާ ވޭޕް މަނާކުރުމުގެ ސިޔާސަތު ށ. ފޭދޫގެ ރައްޔިތުންނަށް ވަރަށް ކަމުދާކަން ހާމަވެއްޖެއެވެ. އެކަން ހާމަވީ ވަގުތު ނޫހުގެ ފަރާތުން އެރަށުގައި ކުރިއަށް ގެންދިޔަ ސާވޭގެ ނަތީޖާއިންނެވެ.

ވަގުތު ނޫހުގެ ފަރާތުން ށ. ފޭދުއަށް ގޮސް ކުރި ސާވޭގައި އެ ރަށުގައި ވޯޓުލެވޭ އާބާދީގެ 607 މީހުންގެ ތެރެއިން 152 މީހުން ބައިވެރިވެފައިވާ ކަމަށް ވަގުތުގައި ރިޕޯޓުކޮށްފައި ވެއެވެ. އެއީ 88 ފިރިހެނުންނާއި 64 އަންހެނުންނެވެ. އެންމެ ގިނަ އަދަދަކަށް ސާވޭގައި މީހުން ބައިވެރިވި އުމުރުފުރާއަކީ 26 އަހަރާއި 35 އަހަރާ ދެމެދުގެ މީހުންނެވެ. އެ އުމުރުފުރާއިން އެކަނި ވެސް 69 މީހުން ބައިވެރިވެފައި ވެއެވެ. އަދި 18 އަހަރާއި 25 އަހަރާއި ދެމެދުގެ އުުމުރުފުރާއިން 15 މީހުންނާއި 36 އަހަރާއި 65 އަހަރާ ދެމެދުގެ އުމުރުފުރާއިން 62 މީހުންގެ އިތުރުން 65 އަހަރުން މަތީގެ 6 މީހުން ބައިވެރިވެފައި ވެއެވެ.

ވޭޕް މަނާކުރަން ތާއީދުކުރަންތޯ ވަގުތުގެ ފަރާތުން ކުރި ސުވާލަށް 133 މީހުން (%88) ތާއީދުކޮށްފައި ވެއެވެ. ވޭޕް މަނާކުރަން ދެކޮޅުހަދާފައި ވަނީ އެންމެ 19 (%12) މީހުންނެވެ.