މިލައުތުރު

ޙައްލު ހޯދޭނެ އެހެން މަގުތައް އޮވެ މަހާރެހެންދީ ކޯޓަށް ވަޑައިގަތުމަކީ ދެރަވަރު ކަމެއް – ދިޔާނާ

ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދަރިކަލަކީ ދުންފަތު އިސްތިއުމާލް ކުރައްވާ ބޭފުޅެއް ކަމަށް ތުހުމަތުކޮށް ދެއްކި ވާހަކަތަކާ ގުޅިގެން މަރިޔަމް ޒުބައިރުގެ މައްޗަށް ރައީސްގެ އަނބިކަނބަލުން، ސާޖިދާ މުހައްމަދު ސިވިލް ކޯޓުގައި ދައުވާ އުފުލުމުން ކުރީގެ ބަންޑާރަނައިބު ދިޔާނާ ސައީދަށް ކަމަކު ނުދިޔައެވެ.

ދިޔާނާ އެކްސް ގައި ކުރެއްވި ޕޯސްޓެއްގައި ވިދާޅުވީ އެންމެ ބޮޑު އެއް ވަކީލު ނަންގަވައިގެން ސިވިލް ކޯޓަށް މެޑަމް ސާޖިދާގެ ފަރާތްޕުޅުން ހުށަހެޅުއްވި މައްސަލައިގައި ހައްލު ހޯދޭނެ އެހެން މަގުތަކެއް ހުރި ކަމަށެވެ. އެހެންކަމުން މައްސަލައަށް ހައްލު ހޯދޭނެ އެކަށޭނެ އެހެން މަގުތައް ހުރިއިރު، ތިމަން ބޭފުޅުން ވާޖަހާ ބަނދެފައި އޮތް ފަނޑިޔާރުގެއަކަށް މި ރޯދަ މަހު މީހުން ގޮވައިގެން ވަޑައިގަތުން ދެރަވަރު ކަމެއް ކަމަށެވެ.

ދިޔާނާ އިތުރަށް ވިދާޅުވީ އެ މައްސަލައިގައި ދައުވާ ކުރުން އެންމެ ރަނގަޅީ އެތަނެއްގައި އެބައެއްގެ ނުފޫޒެއް ނެތް ކޯޓަކަށް ކަމަށާއި، ކުޑަ ބޭފުޅާގެ ރައްކާތެރިކަން ކަށަވަރުކޮށްދޭން އެމްއެންޑީއެފް އެބަ އޮތް ކަމަށާއި ހަގީގަތާ ހިލާފު ވާހަކައެއް ދެކެވޭނަމަ މީޑިއާ ވެސް އެބަ އޮތް ކަމަށެވެ.