ޣައްޒާގެ ރައްޔިތުންގެ ޙައްޤުގައި ޙޫޘީން އަދާކުރާ ދައުރުގެ މުހިންމުކަމަށްޓަކައި ހަމާސްގެ އަސްކަރި ފިޔަކަމުގައިވާ ޤައްސާމް ބްރިގޭޑްގެ ތަރުޖަމާނު އަބޫ އުބައިދާ ނެރުއްވި ބަޔާނެއްގައި ޝުކުރު އަދާކޮށްފިއެވެ. އެ ބަޔާނުގައި އިތުރަށް ބުނެފައިވަނީ ޣައްޒާއިން ފޮނުވާލި ރޮކެޓްތަކާއި، ޔަމަނުން ދޫކޮށްލި ދުރުރާސްތާ މިސައިލްތައް އިޒްރޭލްގެ ވެރިރަށް ތަލްއަވީވްގެ ވައިގެ ތެރެއިން ގުޅި ލާމެހިގެން ދިއުމުން ޣައްޒާއޮތީ ގިނިކަންޏާ ނޫންކަން ކަށަވަރު ވެއްޖެ ކަމަށެވެ.
ހޫޘީން ވަނީ އިޒްރޭލްގެ އެންމެބޮޑު އެއާޕޯޓް ކަމަށްވާ ބެން ގޫރިއަން އިންޓަރނޭޝަނަލް އެއާޕޯޓަށް ހައިޕަރސޮނިކް ބެލިސްޓިކް މިސައިލުން ޙަމަލާދީފައެވެ. ނަމަވެސް، އިޒްރޭލްގެ އަސްކަރިއްޔާ ބުނީ އެ މިސައިލް އޭގެ އަމާޒަށް ވާސިލުވުމުގެކުރިން ވައްޓާލާފައިވާ ކަމަށެވެ. ޙަޤީޤަތަކީ އެ ޙަމަލާ ވެސް ކާމިޔާބު ވެފައިވާ ކަމެވެ. އިޒްރޭލުން އަބަދުވެސް އޮޅުވާލުމަށާއި ރައްޔިތުންގެ ހިތަަށް ވަގުތީ ތަސައްލީ ހޯދައިދިނުމަށްޓަކައި މިސައިލްތައް ވައްޓާލާ ކަމަށް ބުނެއެވެ.
މީގެ ތިންމަސްކުރިން ވެސް ޔަމަނުގެ ޙޫޘީން އިސްރާއީލު ސިފައިންގެ ބޭސްތަކަށާއި، ބެން ގޫރިއަން އެއާޕޯޓަށް، ހައިޕަރސޮނިކް އަދި ބެލިސްޓިކް މިސައިލްތަކުން ދިން ހަމަލާތައް ވަނީ ކާމިޔާބު ކޮށްފައެވެ. އަދި ހޫޘީން ފޮނުވާލާ ކޮންމެ މިސައިލެއް އިޒްރޭލަށް އެހެން ހަމަ ވައްޓާލެވޭނެތޯ ސުވާލުކޮށްފައި ވެއެވެ. އަދި ޙަމަލާތައް އެރުމާގުޅިގެން އެއާޕޯޓު ވަގުތީގޮތުން ބަންދުކޮށް މުޅި ޤައުމުގައި ނުރައްކަލުގެ ޑަނޑޫރާ ޖަހައި ބިރުން ބިންގަރާސްތަކަށް ވަދެ ފިލަންޖެހިފައި ވެއެވެ.
ހޫޘީންނަށް ޝުކުރު އަދާކުރައްވައި ނެރުނު ބަޔާނުގައި ހަމާސްގެ ތަރުޖަމާނު އަބޫ އުބައިދާ ބުނެފައިވަނީ އިޒްރޭލްގެ އިސްތިއުމާރީ ސިފައިން ހިންގާ ނަސްލުނައްތާލުމުގެ ޢަމަލު ހުއްޓުވުމަށް މުޅި ދުނިޔޭ ތެދުވަންޖެހޭ ކަމަށެވެ.
