ޝަމްޢާން ވަޙީދު އިމިގްރޭޝަން ކޮންޓްރޯލަރ ކަމުގެ މަޤާމުން ވަކިކުރެެއްވިކަން ކަށަވަރުވެފައިވާއިރު، ފުލުހުން ގެންދަނީ އިމިގްރޭޝަންގެ މުވައްޒަފުންތަކެއް މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދި މައްސަލައެއް ތަޙްޤީޤު ކުރަމުންނެވެ. ރާއްޖޭގައި ޤަވައިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމުގެ ދާއިރާއިން ކާމިޔާބީތަކެއް ޙާޞިލުކުރައްވާފައިވާތީ ގިނަ ބައެއްގެ ތަރުޙީބު އޭނާއަށް އޮހެމުންދިޔައެވެ.
ފުލުހުންގެ މިރޭގެ ބަޔާނުގައި ވިދާޅުވީ، މޯލްޑިވްސް އިމިގްރޭޝަންގެ ބައެއް މުވައްޒަފުން، މަޤާމުގެ ނުފޫޒު ނަހަމަ ގޮތުގައި ބޭނުންކޮށްގެން ބިދޭސީ މަސައްކަތްތެރިންގެ އަތުން މަންފާ ހޯދުމުގެ މައްސަލައެއް ތަޙުޤީޤުކުރަމުންދާ ކަމަށެވެ. މި މައްސަލައާ ގުޅިގެން މިދިޔަ މާޗް މަހުގެ 20 ވަނަ ދުވަހުގެ ރޭ ހިންގި އޮޕްރޭޝަނެއްގައި 3 މީހަކު ވަނީ ހައްޔަރުކޮށްފައެވެ.
އިމިގްރޭޝަން ޑިޕާޓްމަންޓްގައި 14 އަހަރު މަސައްކަތް ކުރެއްވި ޝަމްޢާން ވަޙީދަށް އިމިގްރޭޝަން ކޮންޓްރޯލަރުކަން ލިބިވަޑައިގަތީ މި ސަރުކާރު ވެރިކަމަށް އައިސް 19 ނޮވެމްބަރ 2023 ގައެވެ.
އޭރު ވެސް ހުރީ އިމިގްރޭޝަންގެ ވަޒީފާއިން ވަކިކޮށްފައެވެ. އެހެން ނަމަވެސް ވަޒީފާއާ ބެހޭ ޓްރައިބިއުނަލުން އޮތީ އޭނާ ވަޒީފާ އިން ވަކިކުރީ ގާނޫނާ ހިލާފަށް ކަމަށް ނިންމައި، އަލުން ވަޒީފާ ރުޖޫއަކޮށްދިނުމަށް އަންގާފައެވެ. އަދި އެއްވެސް ވަރަކަށް ބެލުމެއް ނެތި އިމިގްރޭޝަން ޑިޕާޓްމަންޓްގެ އެންމެ މަތީ ވެރިޔާކަމުގެ މަޤާމު ދެއްވީ ރައީސް ޑރ. މުޙައްމަދު މުޢިއްޒުއެވެ.
