މިފަހަރުގެ ފިތުރު އީދަށްވެސް ރާއްޖޭގެ ރަށްތައް ދިއްލާލަން ނިންމާފައިވާ ކަމަށް ސިޓީސް، ލޯކަލް ގަވަމަންޓް މިނިސްޓްރީން ބުނެފި އެވެ.

މިނިސްޓްރީން ބުނީ އަންނަ ހޮނިހިރު ދުވަހުގެ ރޭ ”އީދު އަލިން“ 65 ރަށެއް ދިއްލާލާނެ ކަމަށެވެ. އެއްފަހަރާ މި ހުރިހާ ރަށެއް ދިއްލާލުމަށް ނިންމާފައިވާއިރު އެ ހަރަކާތް އޮންނަނީ ހޮނިހިރު ދުވަހު ކަމަށް މިނިސްޓްރީން ބުންޏެވެ.

ރަށްތައް ދިއްލުމުގެ ބޮޑު އިވެންޓު އޮންނާނީ ހުޅުމާލޭ ސެންޓްރަލް ޕާކުގަ އެވެ. އެ އިވެންޓުގައި ރައީސް ޑރ. މުހައްމަދު މުއިއްޒު ވެސް ބައިވެރިވެވަޑައިގަންނަވަ އެވެ.

ވެރިރަށް މާލެ އެއްކޮށް އީދަށް ދިއްލުމުގެ ކަންކަން ފެށީ މާލޭގެ މޭޔަރުކަމުގައި މިހާރުގެ ރައީސް މުއިއްޒު ހުންނެވި ދުވަސްވަރު ކަމަށް ވާތީ، އެ މަނިކުފާނު ވެރިކަމަށް ވަޑައިގެން ވަނީ ކޮންމެ އީދަކު މުޅި ރާއްޖެ ދިއްލަން ނިންމަވައިފަ އެވެ.

މިނިސްޓްރީން ބުނެފައިވާ ގޮތުގައި މިދިޔަ އަހަރުގެ ފިތުރު އީދަށް ލައިޓް ނުލިބޭ 36 ރަށަކަށް މި އަހަރު ވަނީ ލައިޓް ހޯދާފަ އެވެ. އެކަމަށް 28 މިލިއަން ރުފިޔާ ހަރަދުވާނެ މިނިސްޓަރު އާދަމް ޝަރީފު ކުރިން ވިދާޅުވެފައިވެ އެވެ.