މިދިޔަ އަހަރުގެ ނޮވެމްބަރު މަހުގެ 17 ވަނަ ދުވަހު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރަސްމީކޮށް އިފުތިތާޙު ކޮށްދެއްވި ދިވެހިރާއްޖޭގެ އަލަތު ޑިވެލޮޕްމަންޓް ބޭންކުގެ ޚިދުމަތް ނުފެށި އުޅެނިކޮށް އެ ބޭންކަށް ފުރަތަ އައްޔަނުކުރެއްވި ފަރަންޖީ ސީއީއޯ އިސްތިއުފާ ފެއްވައިފިއެވެ.
ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދެއް ފުއްދުމުގެ ނަމުގައި، ސަރުކާރަށް އަަހަރެއް ފުރުން ފާހަގަކުރުމުގެ ތެރެއިން މި ބޭންކު އިފުތިތާޙު ކޮށްދެއްވީ ޚުދު އެމަނިކުފާނެވެ. އަދި އިފުތިތާޙު ކުރެއްވުމުގެ ކުލަގަދަ ޙަފުލާގައި ވާހަކަފުޅު ދައްކަވަމުން ވިދާޅުވީ އެއީ ރާއްޖޭގެ ތަރައްޤީގެ އެންމެ މުހިންމު ބައިވެރިޔާއަށް ވެގެންދާނެ މުއައްސަސާއެއް ކަމަށާއި، އެފަދަ ކަމެއް އެންމެ ފުރަތަމަ ތަޢާރަފުކުރައްވާ ފަރާތަކަށް އެމަނިކުފާނު ވެގެންދާ ކަމަށްޓަކައި ފަޚުރުވެރިވެ އުފާކުރައްވާ ކަމަށެވެ.
ނަމަވެސް، ބޮޑު ބޯޑެއް ޖަހާފައި މަތީ ފެންވަރުގައި އިންޓިރިޔާ އެދުމަށް މިލިޔަނުން ފައިސާ ޚަރަދުކުރުމަށް ފަހު، ރައްޔިތަކަށް ޚިދުމަތެއް ދިނުމަށްޓަކައި ދުވަހަކުވެސް ދޮރު ހުޅުވައެއް ނުލައެވެ. އިފުތިތާޙު ކުރެއްވުމަށް ފަހު، ވޭތުވެދިޔަ ހަތަރު މަސްދުވަހުގެ ތެރޭގައި އެ ބޭންކުން ކުރިކަމެއް އެނގޭ އެއްވެސް ފަރާތެއް ނެތެވެ.
