އަނބި މީހާއަށް ގޭތެރޭގެ ކަންކަމުގައި، ވަކި ޚާއްޞަ ޙާލަތްތަކެއްގައި އެހީތެރިވުމަކީ ރީތި ޞިފައެކެވެ. ނަމަވެސް ދުނިޔެއަށް ފޮނުއްވި ޙަޤީޤީ މަޤްޞަދު ދޫކޮށް، ފިރިމީހާ އޭނަގެ ފިރިހެންވަންތަކަމުން ބޭރުވެ، އަންހެންދުޅާވެ، ބަދިގެ ތެރޭގައި ކައްކައި، ތަށި ދޮންނަން ޖެހޭނެ ކަމަށް، ޤަބޫލުކުރާ މިންވަރަށް، މުސްލިމު އަންހެނުންގެ ފިކުރު ފަސާދަވުމަކީ ހުތުރު ކަމެކެވެ. ދެރަކަމެކެވެ.

ބައެއް އަންހެނުން ކައިވެނި ކުރުމުގައި، ކައްކައި ދޮވެ އިސްތިރިކޮށް، ދެންވެސް އަންހެނުން ނަގަންޖެހޭ ގޭތެރޭގެ ޒިންމާތައް ނަގާ ފިރިހެނަކަށްވުން ޝަރުޠު ކުރެއެވެ. އުންމަތެއް ފަސާދަވާނީ ދެން މިވަރަށެވެ.

މިހާރުގެ ބައެއް ދީނީ ޢިލްމުވެރިންނަށް، ދީނީ ކަމެއްގައި ކަންބޮޑުވެގެން ބައްދަލުކުރުމަށް ގުޅާލިޔަސް ބުނެއެވެ. މިއުޅެނީ ބަދިގޭގައި ކައްކާށެވެ. ނުވަތަ ތަށި ދޮންނާށެވެ. ދީނީ ސުވާލުގެ ޖަވާބު ނުލިބި އެއްކަލަ މީހާ އެހުންނަނީ ކަންބޮޑުވުމެއްގައެވެ. މިފެންވަރަށް ފިރިހެނުން ފަސާދަކުރުމަކީ، މީގެ އެތައް އަހަރެއް ކުރިން، ކާފަރުން ފެށި މަކަރުވެރި ފިކުރީ ހަނގުރާމައެކެވެ. މުސްލިމު އަންހެނުންގެ ވިސްނުން ފަސާދަ ވެއްޖެ ނަމަ، މުސްލިމު ފިރިހެނުން ތަޅު އެޅުވޭނެ ކަން، ކާފަރުންނަށް ވަރަށް ރަނގަޅަށް ވިސްނެއެވެ. އޭރުން އިސްލާމް ދީނަށްޓަކައި، ވަޤުތު ހޭދަކުރާނެ ބަޔަކު ނުވާނެއެވެ. އެ ޒިންމާއަށް އިސްވާން ޖެހޭ ފިރިހެނުން، އޭރުން ތިބޭންޖެހޭނީ ބަދިގެތެރޭގައެވެ.

މިއީ ވަރަށް ދުރާލައި ފެށުނު ފިކުރީ ހަނގުރާމައެކެވެ. މިކަމަށްޓަކައި ޚާއްޞަ ފިލްމުތައް އުފައްދައި، މުސްލިމުން އަންހެނުންގެ ފިކުރާ ކުޅުނެވެ. ތަފާތު ޕްރޮގްރާމުތައް ހިންގުނެވެ. ޚާއްޞަކޮށް މުސްލިމު އަންހެނުންނަށް އަމާޒުކޮށްގެންނެވެ. ދީނީ ޢިލްމުވެރިންގެ ތެރެއިން ލޮނުމަޑު ޢިލްމުވެރިން މެދުވެރިކޮށް، ބައެއްކަހަލަ ޚާއްޞަ ޙާލަތްތަކުން ދަލީލު ނަގައިގެން، ފިރިމީހާގެ ޒިންމާތަކުގެ ތެރޭގައި، ގޭތެރޭގެ މަސައްކަތްތައް ވެސް، ހިމަނައިގެން ވިސްނައިދޭން ފެށުނެވެ. މިއީ ވެސް ހަމަހަމަ ކުރުމުގެ ފިކުރުގައި، ކުރެވުނު ކަމެކެވެ.

ހިތާމައަކީ ބައެއް ދީނީ ޢިލްމުވެރިންވެސް، މި މަޅީގައި ޖެހުމެވެ. ޚާއްޞަ ޙާލަތްތަކެއް މެދުވެރި ނުވާއިރުވެސް، ދީނީ ދަޢުވަތާއި ދީނީ ޙަރަކާތްތަކަށް ހުރަސް އެޅޭ މިންވަރަށް، އަހުލުންނަށް ހެޔޮކޮށް ހިތުމުގެ ނަމުގައި، ބަދިގެތެރޭގައި ބިޒީވުމަކީ، އެއީ ވަރަށް ދެރަކަމެކެވެ. ރަސޫލުﷲ ޞައްލަﷲ ޢަލައިހި ވަސައްލަމް، އެކަލޭގެފާނާ ޙަވާލުކުރެވުނު ޒިންމާތައް އަދާ ކުރުމަށް ހުރަސް އެޅޭ މިންވަރަށް، ގޭތެރޭގެ މަސައްކަތްތައް ކުރެއްވި ކަމަށް ބުނުމަކީ، ކަނޑައެޅިގެން ބުހުތާނު ދޮގެކެވެ. އެއީ ކާފަރުންގެ މަކަރުވެރި ރޭވުމުގެ ތެރެއިން، މުސްލިމު އަންހެނުންގެ ކިބާގައި އުފެދުނު ނުބައިކަން ބޮޑު ފިކުރެކެވެ.

އަޅުގަނޑުމެން އަބަދުވެސް ޤަބޫލުކުރާ ހަމައެއް އޮވެއެވެެ.

އަނބިދަރިން ބެލެހެއްޓުމާއި ޚަރަދުކުރުމުގެ ޒިންމާގެ އިތުރުން، ދީނީ ޢިލްމު ފެތުރުމަށް، ނުވަތަ ދީނީ ޙަރަކާތްތަކަށް، އަނބިމީހާގެ ސަބަބުން ހުރަސް އެޅޭނަމަ، އެފަދަ އަންބަކު ނުގެންގުޅޭނަމެވެ. އިންޝާﷲ. ކައިވެނީގެ ކުރިން މިހުރިހާ ވާހަކައެއް ވަރަށް ސާފުކޮށް ކިޔައިދެމެވެ.

މިހާރުގެ ބައެއް އަންހެނުންނަށް ކަމުދަނީ، ފިރިމީހާ އަންހެންދުޅާ ވީމައެވެ. ނަމަވެސް ފިރިހެން ވަންތަ ފިރިހެނުން އެކަމުގައި، ބޯޑަރު ހުރަސް ނުކުރާނެވެ. އަނބިމީހާއަށް އެހީތެރިވާނެއެވެ. ނަމަވެސް އަނބިމީހާއަށް އޭނަގެ މަޤާމާއި ޒިންމާތައް ހަނދާން ނެތޭ މިންވަރަށް، މަގުފުރެދިގެން ނުދާނެއެވެ.

ނޯޓް: މިއީ ޝުއައިބު އަލީ އޭނާގެ އަމިއްލަފުޅު ފޭސްބުކް އެކައުންޓްގައި ލިޔުއްވާފައިވާ ލިޔުމެކެވެ.