މިހާރު ކުރެވެމުންދާ އެންމެ ހޫނު އެއް މީޑިޔާ ބަހުސަކީ ހޯމްލޭންޑް ސެކިޔުރިޓީ މިނިސްޓަރު އަލީ އިހުސާން ޕީއެޗްޑީ ސެޓުފިކެޓެއް ބައްލަވައިގަތުމަށް ފަހު، އެމަނިކުފާނުގެ ނަންފުޅުގެ ކުރިއަށް ޑޮކްޓަރ ޖެއްސެވި ވާހަކައެވެ.
މިނިސްޓަރ އިހުސާނަށް ފާޑުކިޔުންތައް އަމާޒުވެފައި ވަނީ ކުލާހެއްގައި އެއްވެސް ފިލާވަޅެއް އުނގެނުމަކާނުލާ އަގަކަށް ހޯދި ސެޓުފިކެޓެއް ޕީއެޗްޑީއާ މަތިކުރާތީއެވެ. އިހުސާންގެ ސެޓިފިކެޓަކީ ފްރާންސްގެ ޕެރިހުގައި ހުންނަ ޔޫރަޕިއަން އިންޓަނޭޝަނަލް ޔުނިވާސިޓީ (އީޔޫއައި) އިން ދޭ ޕްރޮފެޝަނަލް ޑޮކްޓޯރަލް ސެޓުފިކެޓެކެވެ.
މިނިސްޓަރ އަލީ އިހުސާންގެ ޕީއެޗްޑީ އަކީ ތަޢުލީމީ ސަނަދެއް ނޫނެވެ. އެއީ އެމީހަކު ޚިދުމަތްކުރާ ދާއިރާއަކުން ފާހަގަކޮށްލެވޭ މިންވަރަކަށް ޚިދުމަތް ކުރެވުމުން ނުވަތަ ޚާއްޞަކަމެއް ޙާޞިލުކުރެވުމުން ލިބޭ އެވޯޑެކެވެ. އަދި އެފަދަ އެވޯޑުތަކަކީ އަމިއްލައަށް ހުށަހަޅައިގެން އެއަށް އިދާރީ ބޮޑު ފީއެއް ދައްކައިގެން ލިބޭ އެއްޗެކެވެ. އެފަދަ އެވޯޑުތައް ޙާޞިލުކުރައްވައިގެން ތިބި މީހުން ރާއްޖޭގައި މިހާރު ވަރަށް ގިނަ ވާނެއެވެ.
ވަޒީރު އިހުސާނަށް ވެސް ފުރައްސާރަ ކުރުމެއް ނެތެވެ. އެމަނިކުފާނު ޙާޞިލުކުރެއްވީ އޮނަރަރީ ޑޮކްޓޯރަލްއެއް ނުވަތަ އެވޯޑެކެވެ. އެއީ ފަހަރެއްގައި ވެސް ތަޢުލީމީ ގޮތުން ދަރަޖަ ކުރެވޭ ނުވަތަ ޤައުމީ ސަނަދުތަކުގެ އޮނިގަނޑަށް ފެތޭ ލެވެލް 10 ގެ ސަނަދެއް ނޫނެވެ.
