މިލައުތުރު

ވެރިކަންކުރުމުގެ ބާރުން ބޭނުންވާ ކޮންމެ ދުވަހެއް ބަންދުކޮށް، އިނާޔަތްތައް ދިނުމަކީ ހަމަ އެންމެ ރަނގަޅު ގޮތްތޯއެވެ.

ސަރުކާރު ބަންދު ދުވަހެއް އައުމަކީ އަބަދުވެސް ސަރުކާރު މުވައްޒަފުން އުފާކުރާނެ ކަމެކެވެ. އެއީ މަސައްކަތާ ދުރުގައި ވަގުތު ހޭދަކޮށްލަން ލިބޭ ޗުއްޓީއަކަށް ވާތީއެވެ. ސިޔާސީ ވެރިންނަށް ވެސް މިހާރު މިކަން ވަރަށް ރަނގަޅަށް އެނގެއެވެ. އެހެންކަމުން ބަންދު ދުވަސްތައް ދިނުމުގައި ދީލަތި ވުމަކީ ވެސް މުހިންމު ކަމަކަށް ވެއްޖެއެވެ.

ސަރުކާރު ބަންދު ދުވަސްތައް ހަމަޖައްސަވައި ދެއްވުމުގައި މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިވަނީ އެންމެ މަތީގައި ނަންފުޅު ލިޔެވިފައެވެ. އެކި އެކި މުނާސަބަތުތަކާއެކު އަންނަ ބަންދުތައް ދިގުކޮށް ހަފުތާ ބަންދާ ގުޅުވާލަދެއްވުމާއި، އިންތިޚާބުތަކުގެ ނަތީޖާ ގުނާތަން ބެލުމަށް ވެސް ބަންދުތައް ހަމަޖެއްސެވުމާއި، ރަމަޟާން މަހުގެ ފަހު ދިހަ ރޭއަޅުކަމަށްޓަކައި ބަންދުކުރެއްވުމާއި، ޢީދު ބަންދުތައް ދިގު ކުރެއްވުން ހިމެނެއެވެ.

ރަމަޟާން މަހުގެ ފަހު ދިހައެއް ބަންދުކުރައްވާފައިވަނީ ޙާޟިރީ އެލަވަންސުން ވެސް ބައިރުފިޔާއެއް ވެސް ނުކެނޑޭނެ ފަދަ ދީލަތި ގޮތަކަށެވެ. އަދި އަންނަ އަހަރުން ފެށިގެން ރަމަޟާން މަސް އެއްކޮށް ސަރުކާރު ބަންދު ކުރަނީއެވެ. މިއީ ދިވެހިރާއްޖޭގެ ތާރީޚުގައި ވެސް ސަރުކާރު ބަންދުތައް ދެއްވުމުގައި ފުރިހަމަ ރެކޯޑެކެވެ. ހަމަ ޔަޤީނުން ވެސް ސަރުކާރު މުވައްޒަފުން އުފާވާނެއެވެ. އެހެނަސް، ޚިދުމަތް ހޯދާ ފަރާތްތަކަށް އޮތީ ހިތްދަތިކަމެވެ. ކުރާނެކަމެއް ނެތެވެ. ޤައުމުގެ ވެރިމީހާގެ ނިންމެވުންތަކަށް އިޙްތިރާމުކޮށް އިންތިޒާރު ކުރުން ނޫންގޮތެއް ނެތެވެ.

ސުވާލަކީ، ރައީސުލްޖުމްހޫރިއްޔާއަށް ފެނިވަޑައިގަންނަވާ ކޮންމެ ދުވަހަކީ ސަރުކާރު ބަންދު ދުވަހެއް ކަމުގައި ހަމަޖެއްސެވުމާއި، ފެނިވަޑައިގަންނަވާ ކޮންމެ ގޮތަކަށް މުސާރައާއި އިނާޔަތްތައް ހަމަޖެއްސެވުމަކީ އެންމެ ރަނގަޅު ގޮތްތޯއެވެ. މިފަދަ ކަންކަމަށް ޤާނޫނީ އޮނިގަނޑެއް ނެތްތޯއެވެ. ނުވަތަ ހެދިފައިހުރި ޤާނޫނުތަކުން މިގޮތް ގޮތަށް ތަރުޙީބު ލިބިދެނީތޯއެވެ. ނުވަތަ ދައުލަތުގެ މުދަލާ ފައިސާ އަކީ ރައްޔިތުންގެ މިލްކިއްޔާތު ކަމުގައި ބަޔާންވެފައި އޮތް އޮތުމަށް އިސްތިސްނާތަކެއް އޮތީތޯއެވެ. ނުވަތަ ދައުލަތުގައި މިކަމާ ބަހެއް ބުނާނެ އިތުރު އެއްވެސް ދުލެއް ނެތީތޯއެވެ.