”އީދު ހަނދު ފެނުމާއި ރޯދަ މަހުގެ ހަނދު ސާބިތުވި ގޮތް“ މި ނަމުގައި ޑރ. ހަސަން ހަމީދު ލިޔުއްވާފައިވާ ގޮތުގައި މި އަހަރު ރޯދަމަހުގެ ހަނދު ވެސް ރާއްޖެއަކަށް ފެނިފައިނުވާ ކަމަށާއި، މުޅި އޭޝިއާ ބައްރަށް މާރިޗު 29 ގައި ޝައްވާލު މަހުގެ ހަނދު ވެސް ފެނުމުގެ ފުރުޞަތު ނެތްކަމަށެވެ.
ޑރ. ހަސަންގެ ލިޔުމުގައި ވަނީ 30 މާރިޗަކީ ފިޠުތު ޢީދަށް ވުމުގެ ފުރުޞަތު ނެތްކަމަށާއި، ފިޠުރު ޢީދު ދުވަހަށް ވާނީ 31 މާޗް 2025 ވާ ހޯމަ ދުވަސް ކަމަށެވެ.
ކުރީގެ ރައީސް މައުމޫން ޢަބްދުލްޤައްޔޫމް ވިދާޅުވެފައިވަނީ ސަޢޫދީ ޢަރަބިއްޔާ، މިޞުރު، ތުރުކީ އަދި މޮރޮކޯ ފަދަ އިސްލާމީ ޤައުމުތަކަށް މާރިޗު 29 ވަނަ ދުވަހު އިރުއޮއްސުމަށް ފަހު ހަނދު އޮއްސުމާ ދެމެދު 8 މިނެޓާއި 20 މިނެޓާ ދެމެދުގެ މިންވަރަކަށް ހުންނާނެކަމަށް ފަލަކީ ހިސާބުން ކަށަވަރުވާތީ، ޖެހިގެން އަންނަ މާރިޗު 30 ވަނަ ދުވަހަކީ މިއަހަރުގެ ފިޠުރު ޢީދު ދުވަހަށް ވާނެ ކަމަށް ވަރަށް ބޮޑަށް ޔަޤީން ކުރެއްވޭ ކަމަށެވެ.
ދެ ޢިލްމުވެރިންގެ ތަފާތު ހޯދުންތަކާއެކު އަންނަ ހޮނިހިރު ދުވަހުގެ ރޭ ދިވެހިރާއްޖެއިން ހަނދު ބަލާނެއެވެ. ދިމާވާ ފަރާތް ވެގެންދާނީ ވަރަށް ޚާއްޞަ ފަރާތަކަށް ކަން ޔަޤީނެވެ. ދެ ބޭފުޅުންނަކީ ވެސް ދިވެހީންގެ ލޯތްބާއި އިޙްތިރާމް ލިބިވަޑައިގެން ތިއްބެވި ދެ ބޭފުޅުންނެވެ.
