އެމެރިކާ އާއި އީރާނާ ދެމެދު އޮތް ޒަމާންވީ ހަތުރުވެރިކަމުގައި ހަނގުރާމައެއް ފަށައިފިނަމަ، އެކަމުގެ ބިރު ދިވެހިރާއްޖެއަށް ވެސް އެބަ އޮތެވެ. އެހެނީ އެމެރިކާ ސިފައިން ތިބޭ އަސްކަރީ މަރުކަޒެއް ކަމުގައިވާ ޑިއޭގޯ ގާސިއާ ރާއްޖެއާ އިންވެގެން އޮތުމާއި، ވައިގެ ޙަމަލާތަކަށް އެތަން ބޭނުންކުރާކަމީ ބޮޑު ނުރައްކަލެކެވެ.

އެމެރިކާއިން އީރާނަށް ޙަމަލާ ދީފިނަމަ، ޑިއޭގޯ ގާސިއާއަށް ރައްދު ހަމަލާދީ ގޮއްވާލާނެ ކަމުގެ އިންޒާރު އިރާނުގެ އަސްކަރިއްޔާގެ އިސް އޮފިޝަލަކު ވަނީ ދީފައެވެ. އީރާނުގެ އޮފިޝަލް އިންޒާރު ދީފައިވަނީ އިނގިރޭސިވިލާތުގެ ”ދަ ޓެލެގްރާފް“ ނޫހުން ސުވާލުކުރުމުންނެވެ. އިރާނުގެ އޮފިޝަލު ބުނެފައިވަނީ އެފަދަ ހަމަލާއެއް ދޭއިރު، އިނގިރޭސިވިލާތުގެ ސިފައިން ނުވަތަ އެމެރިކާގެ ސިފައިން ވަކިކުރެމެއް ނެތި އެ އަސްކަރީ މަރުކަޒު ގޮއްވާލާނެ ކަމަށެވެ.

ކުރީގެ ބައެއް ހަނގުރާމަތަކުގައި ބޭނުންކުރި ފަދައިން މިފަހަރު ވެސް އެމެރިކާ ސިފައިން ރާއްޖޭގެ ވައިގެ ސަރަޙައްދު ބޭނުންކުރުމާއި، ފައިޓަރ ޖެޓުތަކަށް ތެޔޮއަޅަން ރާއްޖޭގެ ވައިގެ ބަނދަރު ބޭނުންކޮށްފިނަމަ އެއީ ނުސީދާ ގޮތެއްގައި ހަނގުރާމައަށް ވާގިވެރިވަނީ ކަމުގައި އީރާނުން މާނަކޮށްފާނެއެވެ. އަދި ފޯޅަވަހި އޮތީ ވެސް ކަސިޔާރުވެގެންދާ އުންޑައެއް ރާއްޖެއަށް ފޯރާހާ ކައިރީގައެވެ.

ބައިނަލްއަޤުވާމީ ނޫސް އެޖެންސީތަކުން ރިޕޯޓުކުރާ ގޮތުގައި ޑިއޭގޯ ގާސިއާގައި އެމެރިކާގެ 4000 އަަށް ވުރެ ގިނަ ސިފައިން އަދި އިނގިރޭސި 40 ސިފައިން އެބަ ތިއްބެވެ. އީރާނުން ބުނަނީ ހަނގުރާމައިގެ ޙާލަތެއް މެދުވެރިވެއްޖެ ނަމަ، އެމެރިކާ ސިފައިންގެ މީހެއްތޯ، އިނގިރޭސި މީހެއްތޯ ނުވަތަ ތުރުކީ މީހެއްތޯ ބެލުމެއް ނޯންނާނެ ކަމަށާއި، އެމެރިކާ ސިފައިން އެތަން ބޭނުންކުރާނަމަ ދުރުތާސްތާ މިސައިލުން ޙަަމަލާދީ އެތަން ގޮއްވާލާނެ ކަމަށެވެ.

އިރާނުގެ ރަސްމީ މީޑިއާއިން ބުނެފައިވަނީ ޑިއޭގޯ ގާސިއާއަށް ހަމަލާދިނުމުގެ ގާބިލުކަން އިރާނުގައި އެބަހުރިކަމަށާއި، ފަހުގެ ހޮރަމްޝަހަރު ބެލެސްޓިކް މިސައިލްތަކާއި ޝަހީދު ޑްރޯންތަކުން ހަމަލާދެވޭނެ ކަމަށެވެ. އެހެންކަމުން އެފަދަ ހަނގުރާމައެއް ފެށިއްޖެނަމަ ދިވެހިރާއްޖެއަށް ވެސް އޭގެ ނުރައްކާ ވަރަށް ބޮޑު ވެދާނެއެވެ.