މިފަހަކަށް އައިސް ދިވެހިންނަށް ވިސާ ލިބުމުގައި ދަތިތަކާ ކުރިމަތިވަމުންދާ ސްރީލަންކާގައި ދިވެހީން އެންމެ ގިނައިން ބޭސަފަރުވާ ހޯދަމުންގެންދާ ހޮސްޕިޓަލެއް ކަމަށްވާ ލަންކާ ހޮސްޕިޓަލުން އާސަންދަގެ ޚިދުމަތް ދިނުން ހުއްޓާލައިފިއެވެ.
ލަންކާ ހޮސްޕިޓަލަށް ބޭސްފަރުވާގެ ޚިދުމަތް ހޯދުމަށް ދިޔަ ދިވެހީންގެ ބަޔަކަށް އެ ޚިދުމަތް ހުއްޓާލަން ނިންމާފައިވާ ކަމަށް ބުނެ އެ ހޮސްޕިޓަލުގެ ކަމާބެހޭ މުވައްޒަފުން މަޢުލޫމާތު ދީފިއެވެ. މިކަމާ ގުޅިގެން އާސަންދައިން ބުނަނީ މިފަދަ މައުލޫމާތެއް ލިބިފައިނެތް ކަމަށާއި ލަންކާ ހޮސްޕިޓަލުން ހިދުމަތް ހުއްޓާލި ސަބަބެއް ވެސް ނޭނގޭ ކަމަށެވެ.
މައުލޫމާތު ފުރިހަމައަށް އެނގޭ ފަރާތަކުން ބުނިގޮތުގައި ލަންކާ ހޮސްޕިޓަލުން އާސަންދައިގެ ހިދުމަތް ދިނުން ހުއްޓާލީ ގިނަ އަދަދެއްގެ ބިލުތަކަށް ފައިސާ ނުދައްކާ އޮވެގެންނެވެ. ބިލުތަކަށް ނުދައްކާ ހުރި ފައިސާގެ އަދަދު އެތައް މިލިއަނަކަށް އަރާނެ ކަމަށްވެސް އެ ފަރާތުން މައުލޫމާތު ދިނެވެ.
